WILLEMSTAD.- Konseho Supremo Elektoral (KSE) awor lo duna tur su energia pa prepará elekshonnan pa un parlamento nobo dia 19 di mart. Segun presidente di KSE Raymond ‘Pacheco’ Römer e posibilidat ta keda eksistí ku KSE lo hasi un análisis na e kantidat di votonan inválido durante sostenementu di lista dia 30 i 31 di yanüari. ‘Pero nos mester diskutí esaki ainda den nos Konseho Supremo Elektoral.’ Segun Römer Konseho Supremo Elektoral a tuma desishon kaba pa hasi un análisis tokante esaki. ‘Pero te ainda nos no a tuma desishon kon nos ta bai hasi esaki. Kisas nos ta duna informashon tokante esaki. Te ainda nos no sa.’ Segun Römer e análisis si e ta bai dor òf nò lo no ta kambia nada di e resultado di sostenementu di voto. ‘Resultado ta resultado. Esaki lo no kambia’, Römer a bisa.
Banda di esei Römer ke sa pa ki motibu sierto hende a vota inválido òf a daña papel di voto. ‘Tin hende ku ta skirbi riba dje òf dal un rònchi òf ta duna sunchi riba e papel. E ta zona strañá, pero ta kos ku ta pasa. Nos komo Konseho Supremo Elektoral ke sa dikon e kos a bai asina e aña aki.’