WILLEMSTAD.- Konseho Supremo Elektoral (KSE) ta duna aklarashon riba un petishon di frakshon di PAR, riba forma kon ta atendé ku kredensialnan den parlamentu dia 13 yüni último pa algun miembro a sali for di parlamentu pa bira minister.

KSE a indiká di a pidi pa papia fuera di un ambiente polítiko ku Staten. P’esei nan a haña un reunion separadamente ku presidente di Staten huntu ku griffier i despues ku frakshon di PAR.

KSE a splika ku den e proseso pa bira miembro di parlamentu tin un proseso indiká den lei elektoral ku ta pasa diferente etapa. Esaki ta: mester determiná ken ta bin na remarke a base di resultado di elekshon pa bira miembro di parlamentu i mester haña su/nan kredensialnan; e kandidato mester deklará si e ta dispuesto pa aseptá e asiento den parlamentu; atmishon den parlamentu dor di e kolegio aki despues ku esaki a investigá e kartanan kredensial, i por último e kandidato ta bai serka gobernadó pa su huramentashon òf promesa.

Pues den kaso di yüni 2021, KSE su presidente ta e órgano enkargá pa indiká kua ta e kandidatonan riba lista di e dos partidonan konserní esta PNP i MFK ku por bai okupá un asiento. Aki ta trata yenamentu di puesto den parlamentu ku ta bai bira vakante komo esnan ku ta okupá e puestonan aki lo bira minister i e puesto no por mantené nan lugá den parlamentu mas.

Segun nos leinan elektoral, presidente di KSE, ta indiká e persona(nan) ku ta bin na remarke pa okupá un puesto vakante. Semper e mester tene kuenta ken riba lista ta na turno, kua di nan no por aseptá (pe ya e persona aki tin un un puesto di mandatario), i kua no ta interesá. Presidente di KSE a tuma kontakto ku e kandidatonan i ta entregá e kartanan di kredensial pa nan bai parlamentu kuné komo su karta kredensial.  Te einan ta responsabilidat di presidente di KSE, segun nan ta splika.

Den e kaso di atmishon den parlamentu aki di yüni último,  KSE a kumpli ku su tarea i a indiká e personanan ku ta bin na remarke pa yena e puestonan vakante. Despues di e desishon pa determiná e kandidatonan, ku a keda skohe den elekshon general ta sigui e prosedura pa entrada den parlamentu komo miembro di e órgano di representashon aki. Ningun ora so presidente di KSE a drenta den e relashon polítiko entre partidonan i sigur no a skohe parti ni faboresé un riba otro.