WILLEMSTAD.- Konseho Supremo Elektoral (KSE) no ta honra petishon ofisial di partido KAS pa hasi un re konteo di votonan depositá dia 30 i 31 yanüari último den e proseso pa sostené lista di partidonan ku ke partisipá na elekshon dia 19 mart awor. Asina por konkluí for di e kontesta ku KSE a manda por eskrito pa KAS i ku un kopia di dje ta den poder di redakshon di EXTRA.

KAS den un karta pa KSE a basa su reklamo riba 3 punto prinsipal, esta ku a surgi bruashon si mester firma lista òf laga, kiko ta konstituí sosten di lista no bálido i ku e partido ke un re konteo di e firmanan/votonan. Segun KAS semper den pasado tabata papia di firma lista i ta último tempu a kambia e terminologianan  pa sosten di lista i pre elekshon. Esaki segun e partido a brua e votadó ku tampoko a haña instrukshon konkreto ta kon e tin ku duna su sosten na un sierto lista.

Pa e motibu aki partido KAS ta haña ku KSE mester por ta fleksibel den su evaluashon kiko ta un sosten no bálido Konsekuentemente e partido ke un re konteo di e votonan i un re evaluashon di kiko ta konsiderá un voto/sosten komo no bálido.

Den su karta KSE ku na momento ku a konta votonan ta solamente na 1 urna a konstatá ku un votadó a remarká ku e no ta di akuerdo ku a konsiderá e biyetenan ku tabatin firma ariba komo un voto no bálido. Den niun di e prosèsnan verbal di e 14 urnanan a konstatá ku durante ku tabata konta e votonan votadónan a trese remarkenan dilanti ku ta hustifiká pa hasi un investigashon, KSE ta sigui bisa.

Riba e ponensia di bruashon den terminologianan ku ta usa KSE ta bisa ku semper e konseho konsientemente a i ta papia di sostenementu di lista den forma di un elekshon sin nunka usa e ekspreshon ‘firmamentu di lista’. Ta hasi esaki spesífikamente pa evitá konfushon i mal komprondementu. Tambe t’asina ku na vários okashon den transkurso di añanan a splika e sistema di sostené lista pa medio di votashon.

Pa djaluna awor KSE ta ofisialisá resultado di e sosten di lista ku a tuma lugá. Despues ku a ofisialisá e resultado e konseho ta dispuesto pa hasi un análisis pa wak ta kiko ta e kousa ku tabatin un kantidat relativamente grandi di voto no bálido durante e sosten di lista ku a tuma lugá.