WILLEMSTAD.-E diskushon si tin ‘stembiljet’ pretu ku blanku si òf no a krea un situashon di deskonfiansa den un di e órganonan ku semper a gosa di hopi rèspèt. EXTRA a papia ku Pacheco Römer riba e asuntu aki, tratando na trese klaridat riba e materia. Pacheco Römer ta splika ku tur presidente di urna mester presentá un prosèsverbal den kua ta indiká tur detaye di kosnan ku pasa riba e dia di elekshon. Den e kaso spesífiko si tabatin asuntu di biyete di vota blanku ku pretu, sin niun koló anto esei mester a bini dilanti anto esei no ta e kaso.

Pacheco Römer a duna di konosé ku e djabièrnè anochi 19 di mart, despues ku urnanan a kaba di sera, pa mas o ménos 20.15 or, na momento ku Konseho Supremo Elektoral (KSE) a kaba di duna su último ‘briefing’ na prensa un periodista a trese dilanti ku e tin informashon ku durante di e proseso di votamentu a hasi uso di biyetenan blanku ku pretu. Riba e ponensia aki presidente di KSE a kontesta ku si e biyete usá no ta e biyete ofisial e voto lo ser klasifiká komo inbálido. Despues di e kontesta di presidente di KSE durante di e anochi mas i mas persona tabata manda app i tambe tabata yama pa informá ku segun nan, nan tambe a haña i a vota riba un biyete blanku ku pretu.

KSE riba djasabra (20-3-2021) i djadumingu (21-3-2021) a repasá i kontrolá e prosèsverbalnan di tur e 117 urnanan. Den e prosèsverbalnan e presidentenan ta reportá tur loke a pasa na e urna durante di e proseso di votamentu i tambe tin di duna kuenta i rason di nan trabou.

Pregunta spesífiko na presidentenan di urna

KSE, teniendo kuenta ku e kantidat grandi di personanan ku ta ‘claim’ ku nan a risibi un biyete blanku ku pretu na urna, a disidí di tuma kontakto ku tur e 117 presidentenan di urna pa chèk ku si nan a topa biyetenan blanku ku pretu na momento ku nan a habri e biyetenan pa hasi e konteo di voto. Tur a reportá ku nan no a topa ningun biyete blanku ku pretu. Den nan prosèsverbal tur urna mester indiká tambe, pa loke ta trata e votonan inbálido, e motibu dikon e voto a ser klasifiká komo inbálido.

Den e tabèl ku ta sigui por tuma nota di e motibunan

Motibu di inbalides votonan inbálido elekshon 2021


Kantidat di biyete ku no ta e biyete ofisial
0


Kantidat di biyete ku niun rònchi yena
267


Kantidat di biyete ku mas ku un rònchi yena
401


Kantidat di biyete den kua no a usa pòtlot kora
22


Kantidat di biyete den kua tin remarke skibi
395


Kantidat di biyete sin e firma di presidente di KSE
0


Total kantidat di votonan inbálido
1085


Kantidat di biyete ku stèmpel 'onbruikbaar'
47


Total kantidat di biyetenan
1132

E tabèl ta konfirmá e apresiashon di e presidentenan di urna, pa motibu ku si a topa biyete pretu ku blanku esakinan mester a keda klasifiká den e kategoria di biyetenan no ofisial i manera por konstatá den e tabèl e kantidat di biyete ku no ta e biyete ofisial ta 0. Basá riba loke a keda trese dilanti KSE ta deklará i konfirmá ku pa e elekshon di 19 mart 2021 no tabatin biyete pretu ku blanku.