Sowensly Gijsbertha

 

Ku 19 aña i ya grandi den diseño i moda

E mantel di Prens ku Pancho, grandi i chikí e aña aki ta diseñá pa Sowensly Gijsbertha. Un hóben di 19 aña pero ku ya tin vários proyekto di diseño di moda tras di lomba i eksitoso. E hóben aki ta biba na Ulanda, kaminda e ta studia i tei na Kòrsou pa e temporada di karnaval i asina por a presensiá e elekshon di e Prens i Panchonan.

 

 


Sigui pasonan di mama i wela…

For di chikí Sowensly a lanta mira su mama i wela ta kose. El a haña leuk pa bai e direkshon ei, el a yega di diseñá pa karnaval na Ulanda bou di e fundashon Kracht van de Mens kaminda su mama mes ta presidente. Sowensly a skohe di bai Havo na Ulanda kaminda e por bai den e direkshon di diseño, esta algu kreativo. Sowensly a konta Djasabra ku el a partisipá na diferente elekshon kaminda el a diseñá i kose.

 

Mihó trahe resiklá…

Aña pasá Sowensly a gana Best Recycle Dress na Ulanda i su paña tabata eksponé na Ulanda.

El a partisipá komo diseñadó na diferente otro elekshon ku entre otro trahe di gala i trahe nashonal. Sowensly a bisa ku e ta hasiendo loke e gusta riba e tereno di kreatividat.

 

For di 10 aña….

Sowensly a kuminsá for di 10 aña ku e pashon aki. E mester a bai Gymnasium pero a skohe tòg pa bai un nivel mas abou. Tempu e mester a bai skol avansá no tabatin e posibilidat pa e skohe e kombinashon di arte i kultura den su estudio. I el a bai wak den kua estudio si e por hasié i asina el a disidí ku e ta bai Havo en bes di Gymnasium.

 

Hopi posibilidat….

Bibando na Ulanda e posibilidatnan ta hopi. Ulanda komo parti di Oropa tin mas organisashon ku ta pone kompetenshanan i posibilidatnan pa por sigui desaroyá riba e tereno di arte i kultura, kual ta loke e hóben aki ta gusta mas.

 

Miss Eco International…

Próksimamente mas den fin di mart Sowensly lo ta direkshon nashonal i lo kompania e miss Eco na e kompetensia di Miss Eco International 2019 na Egipto. E miss ku lo bai ta Mariana Pietersz i Sowensly a diseñá pa e okashon aki e trahe nashonal, e trahe Eco i e trahe di gala. Sigur un logro grandi pa un hóben di 19 aña. Segun Sowensly  e miss Eco ta pa defensa di turismo i riba tereno di medio ambiente i trese konosementu riba e tereno di kultura. I esei segun Sowensly ta loke tin un base ekológiko pa asina por spar mundu.

 


Premio Avangard….

El a splika ku Mariana Pietersz ta representá Kòrsou den e elekshon na Egipto. Den pasado el a partisipá den diferente elekshon entre otro Miss Avangard kaminda el a keda eligí. Ta dor di esei Sowensly a keda den kontakto ku Mariana i awor e oportunidat pa e Miss Eco International.

Sowensly mes tambe a gana e premio di Avangard 2019 den diseño. Tin dos premio pa e Avangard aki kual ta e mihó trahe di gala i e mihó trahe resiklá. Pa loke ta e Eco Dress e hóben a splika ku nan a aña un enkargo pa traha algu ku produktonan resiklá. Den e kaso aki Sowensly a usa saku di sushi i kuné el a traha un shimis. ER tema tabata universo tambe i di esei el a traha e paña i spùit e pa asina traha e efekto di espasio i akab’é ku lus pa mustra riba e streanan na shelu.

 

Diferente enkargo…

Den kaso di e partisipashon di Mariana, Sowensly a bisa ku komo e tabatin diferente enkargo pa ehekutá na Kòrsou pa e temporada di karnaval aki i meskos ku pa reina seú, el a adaptá e paña pa un podio mas grandi. Pa loke ta Seú el a organisá na Ulanda i lo sigui kuné den próksimo añanan. Ta importante pa hóbennan di Kòrsou sa di nan kultura. Hopi ta biba na Ulanda pero di Kòrsou i mester sa di nan isla.

 

Mantel pa Prens i Pancho…

E aña aki tambe Sowensly a diseñá e mantel pa Prens ku Pancho. El a splika ku aña pasá el a topa ku representantenan di JAG na Ulanda. Nan a mira loke e ta hasi i a aserka pa e diseñá e mantel di Prens i Pancho hubenil, grandi i tiner. Pa loke ta su kreatividat pa ku e mantelnan el a bisa ku e tema tabata e historia di Kòrsou i karnaval. Sowensly no tabata sa hopi di karnaval su historia pero a bai den historia di Kòrsou. El a traha un kadena ku ta e lasonan ku e diferente kulturanan tin ku otro pa partisipá komo unu den e karnaval di Kòrsou i a pone diferente elemento den dje pa dun’é e toke di karnaval por ehèmpel un oloshi ku 12 or ku at e ora ku ta kima momo.

Den pasado Sowensly tabatin un grupo di karnaval na Ulanda tambe. Pero a stòp ku esei i ta dediká su mes na otro tipo di diseño manera pa miss nan.

 

Moda ta su pashon….

Pa straño ku ta parse, Sowensly su pashon ta moda pero tòg e ta studia pa arkitekto. El a bisa nos di djasabra ku Moda ta su pashon i el a hasié for di chikí. E ta kere ku si e hasi moda pa su estudio dado momentu e lo sintié mará na un kos so i ta bira un trabou pe en bes di su hòbi kual ta loke e diseño di moda ta awor aki. Si e haña oportunidat di krese mas den su hòbi sigur e lo siguié.

Pa mantené su mas al dia di moda e ta bishitá diferente shou di moda. E no ta wak loke ta pasa presis den e mundu di moda pero e ta traha su mes moda. E no ta wòri loke otro hende ta hasi. Loke e ta haña nechi e ta pone su dilanti. E mes ta pone e moda asina Sowensly a indiká. I e koló na moda aktualmente ta un koló maron hel. Ounke Ulanda Kòrsou ta diferente den kolónan na moda. Ulanda ta drai mas pa loke ta temporada.

Pa loke ta trata hóbennan ku ke bai sigui den moda. El a bisa ku ta importante pa e hóben hasi loke e ta sintié importante den dje. Den su kaso su mama semper a sostené i p’esei ta importante pa mayornan yuda nan yunan pa nan desaroyá pa nan hasi loke nan ta gusta.

 

LAGA UN KOMENTARIO

Please enter your comment!
Please enter your name here