Tim Hudisial satisfecho ku e aresto:

WILLEMSTAD. - Mando di RST i Ministerio Públiko di Sint Maarten i di Kòrsou ta satisfecho ku e resultado, esta ku a logra arestá Shurendy ‘Tyson’ Quant na Dubai. Manera ta konosí e organisashonnan ku a kolaborá konhuntamente a duna di konosé ku e detenshon di Tyson a dal un paso importante den e investigashon. Ku esaki ta yega mas serka di e resolushon di vários likidashon, logrando hustisia pa e víktimanan i nan famia.

Aunke ku Tyson no tabata biba ni na Kòrsou ni na Sint Maarten, su influensia a keda grandi den e paisnan aki. Esaki dor di su supuesto ret kriminal mundial.

Ministerio Públiko di Kòrsou sin mas lo solisitá su ekstradishon. E proseso di ekstradishon aki por tuma algun tempu, ya ku Reino Hulandes no tin un tratado di ekstradishon ku Dubai”.

Despues di e detenshon di Tyson na Dubai, tabatin  entradanan hudisial ku a tuma lugá na vários sitio. Asina a realisá entradanan hudisial na Kòrsou i Hulanda. Aki na Kòrsou a realisá entrada hudisial na kuater adrès, esta Kaya Modok, Koraalspechtweg, Zuurzak i na Kirindongo Abou, kaminda ku a arestá un hende hòmber.

E tim investigativo den nan deklarashon a duna di konosé ku den e temporada benidero e investigashon lo kontinuá i mas detenshon no ta ser ekskluí.

Es ku tin informashon ku por yuda e tim di investigashon por tuma kontakto ku e tim via di e siguiente numbernan di telefòn/WhatsApp: +5999 521 3865 (Kòrsou) òf +1 721 586 5052 (Sint Maarten).

Es ku ta preferá di keda anónimo por kompartí informashon dia di e siguiente liña di tep (tambe WhatsApp): +5999 679 2896 (Kòrsou) o +1 721 553 0561 (Sint Maarten).