WILLEMSTAD.- Minister di Desaroyo Sosial, Labor i Bienestar (SOAW) Ruthmilda Larmonie-Cecilia djabièrnè último durante konferensia di prensa a duna mas detaye tokante introdukshon di un karchi nobo pa hende ku tin nesesidat. Un di e puntonan hopi importante, segun Larmonie-Cecilia, ta ku e sistema nobo lo sòru ku gastunan di gobièrnu ta bai baha drástikamente. ‘Ku e sistema aktual di karchi sosial, e ta kosta gobièrnu mas o ménos 600.000 Naf pa aña. Ora nos ta bai na sistema di banko e ta bira 75.000 Naf pa aña. Esei ta nifiká un bahada di gastunan drástiko.’
Manera ta konosí ministerio di SOAW lo introdusí un sistema di karchi di banko pa remplasá e sistema di karchi sosial ku ta aplikabel na e momento akí. E sistema di karchi di banko ta den preparashon, i lo keda introdusí pronto na luna di yüli.
Den transkurso di e dianan akí SOAW lo duna mas informashon pa konsientisá usuarionan kon pa manehá nan presupuesto.
Segun minister Larmonie-Cecila, ku tambe ta lider di partido PNP, Kòrsou ta bibando den krísis i ta pidiendo sosten finansiero pa por haña fondo di likides. Si gobièrnu por baha gastunan ku introdukshon di un sistema nobo esaki ta algu positivo.
Larmonie-Cecilia mes a duna di konosé ku e ta di opinion ku kada usuario di ántes karchi sosial tin derecho di por hasi uso di su karchi di banko den kualke supermerkado, sin ku su bisiña mester sa ku e ta dependé di e sosten di gobièrnu pa por alimentá su mes i/òf su famia.
Manera ta konosí tur miembronan di organisashon di supermerkadonan na Kòrsou, SUVECU, lo stòp di aseptá e karchi sosial di Ministerio di Desaroyo Sosial, Labor i Bienestar pa kompra den nan supermerkadonan.
Sra. Larmonie- Cecilia ta di opinion ku e sistema nobo di karchi di banko akí ta solushoná tur e opheshonnan ku SUVECU tin kontra e sistema aktual.