WILLEMSTAD.- N’e momentunan aki i teniendo kuenta ku aspektonan legal, gobièrnu no por para e elekshon di dia 28 di aprel próksimo. Es mas, no por remplasá miembronan di Konseho Supremo Elektoral (KSE) tampoko, a ménos ku nan mes disidí di tuma nan retiro boluntariamente.

Nos Areglo di Estado ta papia palabra kla. KSE ta funshoná a base di lei, i si gobièrnu no presentá ku un landsbesluit den man ku ta bisa ku tin di posponé elekshon, KSE lo kontinuá normalmente ku e mandato ku el a haña di Gabinete Koeiman, esta di bai pa elekshon nobo. Asina e eks hefe di Registro Sivil i alabes eks miembro di KSE, sr. Angel Ramirez, a duna di konosé na EXTRA den un splikashon hopi amplio.

MIEMBRONAN NOBO KSE

Pa loke ta e miembronan di KSE, sr. Ramirez a splika ku nos Reglamento Elektoral ta bisa ku atraves di un dekreto e minister den funshon por nombrá miembronan nobo. Pero e mandatario ta haña un lapso di 30 dia promé ku entrega di lista pa e hasi esei. Esei ta nifiká ku nombramentu di miembronan nobo no ta posibel mas, a ménos ku esnan aktual disidí di retirá boluntariamente.

POSPONE ELEKSHON

Pa loke ta e kuestion di posponementu di elekshon, segun sr. Ramirez, KSE no tin e outoridat pa hasi esei, pasobra ta a base di mandato e ta operá. Si no tin un dekreto ofisial ku ta bisa esei, e lo sigui prepará normalmente ku bista riba elekshon. Na luna di òktober 2016 a kambia fecha di elekshon, pero esei tabata pa motibu di forsa mayor (wer), i ademas tur hende a bai di akuerdo aunke defakto no tabatin mag.

Gobièrnu tampoko no por pidi pa posponé elekshon si e no tin un dekreto den man pa ordená esei. I teniendo kuenta ku Gobernador a bai di akuerdo kaba pa konvoká elekshon nobo, segun Ramirez e ta duda ku Gobernador lo firma pa posponé.

DISOLVE PARLAMENTO

Sr. Ramirez ta splika ku, den Areglo di Estado ta para ku na momentu ku gobièrnu no tin sosten di Parlamento mas, no ta keda nada otro sino di disolvé Staten. Pero na momentu ku nan traha e dekreto ei e mester bai kompañá ku un fecha nobo pa elekshon. I esei ta algu obligatorio. No por disolvé Parlamento sin pone fecha nobo pa elekshon. I esei ta algu ku mester sosodé denter di un término di máksimo tres luna.

KORTE EUROPEO

Pa loke ta e posibel pasonan pa bai Korte Europeo, segun Ramirez e ta duda ku Korte Europeo lo por forsa un elekshon pa nos aki na Kòrsou ya ku ta trata di algu interno. Asta Korte Europeo lo por deklará gobièrnu no-aksesibel pa motibu ku el a bula pasa diferente otro stashon den e sistema hudisial pa yega direktamente na Korte Europeo.