WILLEMSTAD.- Ayera Hof a konfirmá e kondena di 30 aña pa Andrew Oseana (40) akusá pa dòbel i intento di asesinato.
Tambe el a keda kondená pa poseshon di arma kandela.
Ta trata di e kaso ku a tuma lugá na Souax dia 23 di mei 2018. Apesar ku semper Oseana a insistí riba su inosensia, den korte di promé instansia hues a hañ’é kulpabel i a konden’é na 30 aña di kastigu. Oseana a apelá pa motibu ku e ta para riba di no ta esun ku a kometé e akto.
Segun e akusashon, Oseana a yega basha bala ku shotgun na e sitio, i komo konsekuensia e víktimanan C.Molina i J. Pedro a pèrdè nan bida na edat di 19 i 23 aña.
Shurrensly Thielman (26) tambe ta haña bala, pero a keda transportá pa Colombia urgentemente pa tratamentu médiko mas avansá, debí ku e bala a okashoná problema na su pulmon.
Thielman a sobrebibí e tiroteo i a regresá Kòrsou den mihó kondishon, pero a keda ku problemanan ku su salú i probablemente tin ku biba kuné.
El a hasi vários deklarashon na momento ku e tabata na Colombia i tambe durante tratamentu di e kaso di apelashon.
Mama di Thielman a deklará di a tende 4 tiru i ora el a sali pa bai wak, el a mira su yu hòmber bentá abou. Ora el a yega serka su yu, esaki a bis’é ku ta “Boyo” a laga hende bin pa kaba kuné.
Despues e yu a bai fo’i dje i no a reakshoná mas. Oseana ku ta keda yamá “Boyo” pa tur su konosínan, a ninga redondamente di ta involukrá den e kaso.
Hues a relatá ku na Colombia, Thielman a konta su ruman ku e tabata debe Boyo 700 florin di un arma di kandela ku el a kumpra serka dje.
Boyo a bin riba un djamars pa kobra su sèn, pero el a bisa Boyo ku e no tabatin e sèn i ku e por ward’é te djárason.
Riba e dia en kuestion, Boyo a bolbe presentá na momento ku e tabata sintá riba e stupi di su Barbershop.
El a bisa ku Boyo a yega i a puntr’é pa su sèn. Na momento ku el a bis’é ku ainda e no a keda kla, Boyo a bis’é ku e no tin koriente ni gasolin i ku el a kansa.
Boyo a bai su outo, kue un arma di kandela i lòs bala riba dje. Ora ku e víktima Pedro a puntr’é dikon el a tira e hòmber, el a tira Pedro tambe, despues e otro víktima Molina.
Segun Thielman mas aleu, Boyo a kere sigur ku e lo a muri.
El a bisa di ta kere ku el a mata e dos otro gainan pa nan no ta testigu di loke e kier a hasi kuné. Durante e kaso, Thielman a para komo testigu i a bisa di ta rekonosé Oseana komo esun ku a tir’e. Thielman tabata sintié hopi inkómodo i a bandoná sala manera el a kaba di deklará.
El a bisa di a kumpra e arma serka Oseana paso e tabatin un Barbershop i tin miedu pa nan atrak’é. P’esei el a kumpra e arma pa defendé su kurpa. Segun Thielman ta trata di un revòlver chikí sin lachi bala.
Oseana a splika ku e dia ei el a bai pa kuminda Thielman, pero despues a kita bai promé ku e suseso. E ta bon amigu ku Thielman su ruman. E no sa nada di e tiroteo. Hues a bisa ku a haña rastro di polvo riba su karson i tambe su djòki. Segun e akusado, despues di a sali un training di tira, el a pone e arma mei mei di su pia i kisas esei a pone ku e rastronan a keda riba su karson.
Oseana tabata hefe na e kompania Panamericano i tabata duna instrukshon di tira.
Abogado general mr Angela a bisa entre otro ku tin sufisiente prueba kontra e akusado i vários deklarashon. Entre otro di Thielman ku a rekonosé komo esun ku a tira e i e otro víktimanan. Fiskal a haña ku Oseana a aktua ku sanger friu na momento ku el a bai ku un shotgun, dirigí riba e víktimanan i riba un distansia kòrtiku a kaba ku nan bida. Tur 3 víktima a haña bala den pechu i un di nan a haña bala den kabes. Mirando tur esakinan abogado general a bolbe pidi 30 aña.
Hof den su veredikto a bisa ayera ku no por proba ku e akusado a tira e dos amigunan di Thielman a propósito i p’esei no por konsider’é komo homisidio premeditá. Pero pa loke ta trata Thielman si Hof a haña ku el a tir’é premeditá. Hof a bisa ku e akusado a aktua sanger friu i durante tratamentu di e kaso no a tuma responsabilidat i mustra duele. Mirando tur esakinan e tribunal di Hof a honra e kastigu di 30 aña pa Oseana.