WILLEMSTAD.- Vakunashon so lo por yuda nos sali for di e krísis aki i e medidanan ku ta den implementashon. E kantidat di kaso ta bahando e último dianan, pero e bahada ta lento pasobra ainda e infekshonnan ta hopi. Ta solamente ku vakunashon nos por trese alivio den tur sentido. Esei di akuerdo ku dr. Izzy Gerstenbluth durante e enkuentro ku prensa dje siman aki. Primeramente dr. Gerstenbluth a duna un splikashon riba e sifranan di dia unda a registrá 240 kaso positivo nobo; tin 130 persona den hospital i 41 den kuido intensivo, i 62 persona a fayesé (2 mas ayera).

Pa loke ta e faktor di multiplikashon, pues kon kada ken ta infektá otro, el a bisa ku algun siman pasá esaki tabata na 1.5, pues kada hende positivo tabata infektá 1.5 otro. Aktualmente el a bai bèk na 1, pero e kantidat di kaso a keda haltu. E kantidatnan ku ta bini aserka tur dia ta keda den kareda di 200 òf mas, ku ta haltu. Loke por mira den grafiknan ta ku e situashon no ta bahando di un manera skèrpi sino ku e ta bayendo poko poko.

Segun e epidemiólogo dikon e situashon ta asina, esei pa motibu ku e variante dje vírus ku tin aktualmente a plama mas lihé. Ku dekreto i implementashon di medidanan a logra bah’e algu, pero ni e medidanan no ta sufisiente pa baha esaki rápidamente. Esei ta nifiká ku por lo pronto nos lo keda haña un 200 piku kaso positivo pa dia, loke ta nifiká ku e ta bai pone un preshon grandi riba nos hospital. Otro siman gobièrnu lo bai anunsiá adaptashon di medidanan, pero ta importante pa sa si ku e kantidatnan ta keda haltu. Tin medidanan ku tin di drenta na vigor, tin medidanan ku lo no por kita, pero ku medidanan so lo no ta sufisiente pa realmente trese alivio. Úniko manera pa trese alivio ne momentunan aki ta mediante vakunashon.

Problema grandi:

Segun e epidemiólogo, e problema mas grandi aktualmente ta den 40-65 aña. Ta e grupo aki ta esun di mas riesgo pa keda infektá i drenta hospital. Den kuminsamentu e problema tabata sinta den e grupo di edat haltu, aki e mortonan tabata kai.

Pero loke ta mira awor, ta ku esnan entre 40-65 aña ta birando mas grandi, aki mas morto ta kayendo, asta den grupo mas abou. Ku e vírus aki mas hende hóben ta fayesiendo. I e manera pa frena e desaroyo aki mas lihé posibel ta mediante vakunashon.