WILLEMSTAD - E barku di Patruya Zr.Ms. Holland ta yega Kòrsou bek mañan. Ku esaki Region Karibe tin atrobe un barku di Patruya operashonal na su disposishon. Ku un saludo for di Fort Krommelijn e barku ta drenta ku un seremonia pa Komandante di Forsanan Naval den Region Karibe.  Zr.Ms. Holland lo permanesé den Region Karibe pa un mínimo di 6 luna.

E lunanan benidero e barku lo patruyá intensivamente riba Laman Karibe. Einan entre otro e ta keda desplegá pa operashonnan anti droga, mantenshon di órden kontra kontrabanda di arma i trafikashon di hende. Pero tambe eventualmente pa yudansa di emergensia durante orkan, paden i pafó di Reino. E barku lo nabegá tambe pa Wardakosta, i lo envolví su mes ku mantenshon di reglanan di medio ambiente, por ehèmpel si tin di aber ku piskamentu (ilegal).

E barku patruyero nobo ta un (“Oceangoing Patrol Vessel”) pa laman ganchu, di Klase Hulandes. Zr.Ms. Holland na kuminsamentu di 2018 tabata pa último biaha aktivo komo barku patruyero den Region Karibe. E barku tin tambe un helikòpter di kombate marítimo NH90 na bordo, kual eventualmente, huntu ku e barku patruyero, por ehersé operashonnan di búskeda i reskate.

Ku e presensia di e barku patruyero forsanan armá ta kumpli ku nan tareanan konstitushonal, por ehèmpel mantenshon di órden hurídiko internashonal. E anterior barku patruyero, Zr.Ms. Groningen, a sabi di marka pouta di kaptura di droga sinku biaha den un luna.