Si un ladron hòrta 6 florin, 60 florin òf 600 florin, nada dje suma no ta hasié ménos ladron. Pues si a haña 6 kilo, 60 kilo òf 600 kilo serka  Marina, e ta un bèrgwensa. E publikashon di EXTRA djaluna mainta menshonando ku a haña un kantidat di 600 kilo den e  kònteiner riba tereno di Marina na Parera no a kai den masha bon tera serka e bosero, pa motibu ku e kantidat ku nos a menshoná supuestamente no tabata asina, pero tampoko e no ke bisa ta kuantu. Hopi medio di komunikashon a tapa wowo pa e krímen mes i tene duru ku no ta 600 kilo. Ta un bèrgwensa ku riba tereno di Marina ta haña droga. Ta un bèrgwensa ku marinir ta envolví un biaha mas den mandamentu di droga Ulanda.

E bosero a insinuá ku ta daña nòmber di Marina ora a meskla e droga ku a hòrta di warda di polis ku e droga ku a haña den kònteiner RIBA TERENO di MARINE. Un biaha mas tapando wowo pa e realidat i ke purba tira kulpa riba un publikashon di un kantidat di droga ku lo no ta korekto sin pidi komunidat diskulpa di kiko ta pasando riba nan mes tereno. E kantidat no ta importante, sino e echo ku a haña droga serka bo, ku ta un dje partinan mas fuerte den nos kadena hudisial. Un entidat di prestigio!

I pió ainda, e biaha aki si, no por bisa ainda ta kuantu droga a haña, supuestamente pasobra e ta na bienestar di e investigashon. Echo ta ku no ta promé bes ku personal di Marine ta envolví den trafikashon di droga for di e teritorio di Kòrsou (Antia). Nos ke rekordá marina ku aña pasa tambe den mesun periodo aki na Doorn Ulanda, a interseptá mas di 10 tas yena ku kokaina di personal di marina ku a bandoná e isla di St. Maarten. Nos ta kere ku ta den e direkshon ei nan tin di wak i no buska palu pa dal kachó pa un kantidat di droga ku segun nan no ta korekto. Loke Marine tin di hasi ta para tur spekulashon i sali i papia kiko tabatin riba nan tereno i kuminsá sefta mihó ken nan ta stashoná na nos isla, i kendenan mester ta aki pa defendé nos i no ta kometé krímen!