Nan tabatin intenshon pa kibra un ATM

WILLEMSTAD. - Resientemente Korte Rotterdam a kondená kuater hòmber yu di Kòrsou ku polis a gara ku eksplosivo. E kuarteto aki a kai den gara di polis, ora ku bisiñanan a tuma nota ku tin kuater hòmber ku tabata kargando un vèn ku hopi material den oranan di anochi. Esaki a lanta e sospecho i ora ku un di e hòmbernan a reklamá un bisiña ku tabatin muchu atenshon pa nan, esaki a bira un pleitu.

Konsekuentemente polis a bin pa atendé e asuntu i a haña eksplosivo den nan vèn. Skèr pa kòrta heru, tur tipo di hèrmènt pa hasi trabou pisá, mea pa tapa kara etcetera tambe a keda hañá den e vèn.

E kuarteto aki no tabatin un bon splikashon kiko nan tabata trahando riba dje i esaki a kondusí na nan aresto.

Algun siman pasá korte a trata nan kaso, kaminda ku dos di nan a deklará ku nan ta inosente i ku nan no tabatin niun intenshon di kibra niun ATM. Pero dos otro a bisa ku nan a asta kore e ruta ku nan mester bai pa konosé e área ku nan ta bai kometé e kiebro di e ATM.

“Plofkraak” ta hopi usá na Hulanda pa kibra ATM. Den e kaso aki e kuarteto aki pa motibu ku bisiñanan a tuma nota di moveshonnan sospechoso, a logra gara nan.

Ministerio Públiko tabata amplio durante su rekisitorio i a mustra riba kon peligroso “plofkraak” por ta.

Esaki a kondusí na un demanda di 24 luna di kua 6 luna kondishonal i un periodo di 2 aña di prueba.

Wes a motivá su kondena den 10 página kaminda ku el a yega na un kondena di 18 luna di kua 6 luna kondishonal i 2 aña di prueba.

(Foto File)