WILLEMSTAD.- Kuerpo Polisial ta tene awe djabièrnè 23 di aprel un kadena di orashon pa tur nos rumannan rònt mundu i muy en partikular riba e isla aki, ku ta pasando den e momentunan difísil aki.

Ultimo lunanan mundu henter pero tambe diferente siudadano di nos pais a keda afektá pa e vírus di Corona. Vários kompatriota a sali bon for di dje, pero un kantidat a keda hospitalisá i lamentablemente un grupo konsiderabel di nos famianan, konosínan, amistatnan i koleganan no a sobreviví e enfermedat aki.

Komo Kuerpo Polisial nan a traha di dia i anochi pa yuda kuida nos komunidat i trata na tene e rísiko mas abou posibel. Tur hende su esfuerso a yuda ku e sifranan a kuminsá baha.

Pero ainda no a yega i no ta sigur ku por lo pronto nos ta kompletamente liber di e pandemia aki.

P’esei e orashon pa pidi Dios tambe sabiduria i forsa pa tur esnan den kuido ku ta lucha tur dia pa skapa tantu bida. E kadena di orashon lo ta awe djabièrnè 7 or pa mitar di 8 or di anochi i lo keda transmití pa e diferente medionan di komunikashon entre otro pa nos tambe di EXTRA riba nos plataforma digital (FB; extracuracao).