WILLEMSTAD: Kuerpo polisial ta informá ku durante di Marcha Hubenil ku ta tras di lomba, polis a konstatá na algun sitio riba e ruta, ku e públiko a sigui toka muzik duru, despues ku ya e marcha a pasa kaba.

Meskos ku e añanan anterior, asina ku e marcha kaba di pasa kaminda bo ta pará òf ku bo tin bo ‘stellage’, mester stòp tur muzik kantu di kaya inmediatamente.

Pa e marchanan benidero, polis lo bai aktua i pèrkurá pa tur hende tene nan mes na e regla aki.

Alabes polis ta hasi un súplika na bandanan i DJ-nan ku ta kompañá gruponan di karnaval durante di e marcha, pa na momentu ku nan yega na final, stòp e muzik.

No ta pèrmití tampoko pa sigui toka riba kaminda mientras ku e vehíkulo ta kore di final di e marcha pa bai su destinashon.