WILLEMSTAD - Kuerpo Polisial ta refutá e insinuashonnan i deklarashonnan infundá, ku djabièrnè dia 4 di desèmber último, durante di un kontrol di e tim forma pa Polis i M.E.O., a bin topa dos funshonario Polisial di alto rango ta konsumí alkohòl na un toko durante di lei seku vigente.

Despues di a tuma nota di deklarashonnan hasí durante di un entrevista na un emisora lokal djadumingu último, den kua e inspektor di M.E.O. a konfirmá ku a topa dos funshonario polisial di alto rango na un toko ta konsumí alkohòl, maneho di Kuerpo Polisial a kuminsá inmediatamente ku un investigashon.

Durante di e investigashon aki, ku tabata na enkargo di e departamento di asuntunan interno (B.I.Z.), a skucha entre otro:

Ø E doño di e toko en kestion;

Ø E inspektor di M.E.O. ku a hasi e deklarashon.

Ø E personal di M.E.O. ku tabata presente durante di e kontrol;

Ø E polisnan ku tabata presente durante di e kontrol.

Banda di e interogashonnan aki, a wak grabashonnan tambe di kámara ku tabatin na e toko. For di tur e deklarashonnan di e personanan ku a keda skuchá, a sali na kla ku ningun momentu, e dos funshonarionan tabata na e toko en kuestion ni a bishita e toko promé ku e tim di kontrol a yega.

Den edishon di mayan di EXTRA lo tin un relato mas amplio.