Algun detenshon (9) den kambio di aña e.o pa violensia relashonal

WILLEMSTAD.-Den liñanan grandi por bisa ku komportashon di komunidat den dianan rondó di kambio di aña a bai basta bon. Kuerpo Polisial ta felisitá komunidat di Kòrsou pa esei, na palabra bosero di polis Maurtis Rosalia. Tabatin un total di nuebe detenshon den kambio di aña te awor. Esaki ta pa loke ta trata e evento di ‘Ban tende tiru den union’ riba Brionplein i na diferente sitio ku tabatin aktividat. E kosnan a kana relativamente bon.

Mas aleu e bosero polisial a duna di konosé ku e detenshonnan ta relashoná ku violensia relashonal, kasonan di maltrato, destrukshon, manehá vehíkulo bou di influensia di bebida alkohóliko, 5 aksidente di tráfiko ku herido kaminda mester a transportá víktimanan pa sala di emergensia di CMC pa kuido medio mas avansá. E motibu di aksidentenan aki tabata entre otro pa pasamentu den lus kora i kore outo pa loko. EXTRA a tuma nota ku den fin di aña na vários okashon tabatin kontrol di polis na vários sitio.

Violensia relashonal ta figura prominente entre e kasonan ku polis mester a duna asistensia i asta tabatin detenshon. Bosero polisial ta splika ku esaki ta entre e tipo di kasonan ku polis ta poniendo basta atenshon riba dje. A pone violensia relashonal riba e mesun nivel di importansia haltu ku kasonan di atrako, ladronisia di vehíkulo, kasonan di tiroteo, asesinato, aksidentenan di tráfiko kaminda tin víktima fatal, ladronisia den empresa etc. tur eseinan ta krímen di impakto haltu.

Kompará ku otro añanan e kambio di 2023 pa 2024 a bai relativamente bon.

Ya kaba Kuerpo Polisial ta preparando pa karnaval i meskos a hasi relashoná ku Fuikdag di djadumingu próksimo. Lo bai kontrolá tráfiko i tambe órden publiko.