WILLEMSTAD.- Den un kombersashon ku Bosero di Kuerpo Polisial di Korsou Imro Zwerwer, e la indiká na EXTRA ku awe mainta a sali un informashon kompletamente robes tokante e sistema di seguridat na Warda di Polis na Rio Canario ku aparentemente lo a kai afó.

Di un forma hopi iresponsabel i sin tuma kontakto ku Kuerpo Polisial, un planta di televishon a saka un informashon di último ora, informando ku deskonosínan lo mester a desaktiva e sistema di seguridat di e kamber kaminda tin tur arma warda.

E kamber aki ta un kamber kaminda tin algun mil arma warda bou di alta seguridat. Pues no ta asina asina por desaktiva e sistema di seguridat ni tampoko yega na e kamber aki.

Loke a tuma lugá ta ku den kuadro di trabounan di konstrukshon na ORV (Skol di Polis) kontratista a mishi ku algun kabel di kámaranan den e lugá pa wak pafó i no esnan di seguridat ku ta mara na e kamber di warda arma ku tin seguridat máksimo riba dje.

Pues no tabatin nada di aber ku intento di robo.

Mesora despues di a mishi ku e waya, e kontratistanan a pone Kuerpo Polisial na altura kual mesora a atendé ku e kaso aki.