WILLEMSTAD.- Kuerpo Polisial ta anunsiá ku awor por hasi denunsia via di E-Form.
Kuerpo Polisial ta sigui perfekshoná su proseso di hasi denunsia dor di hasi bida di esun ku ya lamentablemente a bira víktima di un echo kastigabel òf esun ku a tuma nota di esaki, mas fásil.
Awor denunsiantenan di sea ladronisia, kiebro, destrukshon, menasa, maltrato òf violensia, por subi nan wèpsait (www.polis.cw) i yena tur informashon di nan denunsia ofisial kompletu.
Si te ku e momentunan aki, ta manda deklarashon ‘online’ i polis mester traha e denunsia, aworakí e siudadano mes por yena tur detaye a base di e preguntanan riba e formulario
digital i agregá eventualmente potrèt òf video di e suseso.
Ora subi e wèpsait, ta klek riba “Hasi denunsia” i despues ta klek riba e balki blou te
abou riba e página.
Inmediatamente e E-Form ta habri, di manera ku por kuminsá yena e informashonnan ku ta wòrdu pidí.
Di e manera aki ta risibí tur informashon ku kuerpo polisial mester, sin ku mester keda yama, pa risibí informashon adishonal pa konkluí e denunsia.
Ta importante si, pa kontesta e preguntanan riba e E- Form mas kompletu posibel.
Esaki ta aselerá e proseso pa denunsiá wòrdu prosesá i kaso keda investigá.
Outomátikamente e informashon ku bo yena den e E-Form, ta drenta digital na e warda di
polis konserní, kaminda e ta keda prosesá.
Seguidamente lo bo risibí un yamada telefóniko òf mail pa asina bo pasa firma bo denunsia.