WILLEMSTAD.- Kuerpo Polisial ke rekordá tur komunidat ku playa i laman no ta kompletamente “habrí”. T’asina ku ayera polis a tuma nota, ku kontrario na e orarionan asigná pa ta na playa i den laman, tin un kantidat grandi di hende landando durante di henter dia.
No solamente ayera riba dia di fiesta, pero riba otro dianan tambe.
Kuerpo Polisial ke bolbe rekordá ku e orarionan pa landa konforme reglanan stipulá ta di mitar di 5 di mardugá (4:30 am) pa 9 or di mainta i di mitar di 5 di atardi (4:30) pa mitar di 7 di anochi (6:30). Esaki ta segun e regla di deskalashon ku gobièrnu a anunsiá resientemente. Tambe solamente kuater hende di den kas por ta huntu den orarionan menshoná na laman.
Pafó di e orarionan ei, polis lo saka tur hende for di awa i si ta nesesario lo repartí prosèsverbal tambe.