WILLEMSTAD.- Tin un proseso amplio di evaluashon tumando lugá den seno di partido PAR. Meta di e evaluashon ta pa pone dede riba e tópikonan ku a kousa un kaida di mas ku kasi 7.000 voto i pèrdida di 2 asiento durante elekshon di 19 mart último kompará ku elekshon di 2017.

Miembronan di e partido a haña un formulario di enkuesta largu pa yena kaminda ta hasi vários pregunta riba tópikonan ku a kousa diskushon den komunidat último 4 aña i alabes lo por tabata motibu pa e votadónan a bira lomba pa e partido.

E kuestionario ta yega asina tambe na un evaluashon di prestashon di ministernan i parlamentarionan di partido PAR. Tópikonan ku ta para ketu na dje ta entre otro COVID-19, akuerdo ku Hulanda i e reformanan, 600 kilo di kokaina ku a disparsé, maneho di imigrashon i estado di vianan públiko djis pa menshoná algun.

E resultado di elekshon tabata un sla duru pa PAR i tin un realisashon ku kosnan mester bai otro den futuro. E situashon aki ta kousa di basta tenshon den e partido. Manera EXTRA a informá kaba ku a kuminsá ku un direkshon nobo den PAR pidiendo Zita Jesus-Leito pa no aseptá e posishon di parlamentario i laga Steven Croes ku a presta bon durante elekshon ku 648 personal espasio pa sigui profilá su mes ku mira riba futuro.

Jesus-Leito sinembargo no a bai di akuerdo ku esaki i dia 11 mei awor lo hura komo parlamentario. E echo aki so ta eksponé otro problema den seno di e partido hel, esta un falta di toma di desishon ku man duru. Tabatin un koriente fuerte den e partido pa pidi Jesus-Leito pa karga lista durante último elekshon, pero lider polítiko Eugene Rhuggenaath a tuma desishon final pa tòg pone Jesus-Leito number 4. Parse ku tabata e mesun Rhuggenaath aki ku despues di elekshon a bai papia ku Jesus-Leito pa no tuma asiento den parlamento.