Kuida Kurpa, un ekspreshon asina usual na nos idioma Papiamentu ku ta wòrdu usá diariamente dor di nos tur na momento ku nos kier ekspresá nos mes ku otro. Sinembargo bo a yega di puntra bo mes, kiko bo kiermen or abo deseá un otro pa Kuida su Kurpa òf kon abo por Kuida bo Kurpa mas mihó?

Programa Kuida Kurpa, ta enfoká riba duna informashon, splikashon I tips riba e diferente áreanan relevante ku nos por Kuida Kurpa pa nos mes, I siña tur esnan rondó di nos pa bira mas konsiente kon nan tambe por kuida nan mes mas mihó.

Pa luna di mei nos lo enfoká riba e aspekto di Kuida bo Emoshon

Bienestar emoshonal ta e abilidat di por atendé ku e impakto di stressnan di bida na un manera eksitoso I a la bes bo kapasidat di por adaptá  na kambio I durante situashonnan difísil.

Pa por kuida nos emoshon, nos mester por mantené un estado emoshonal positivo, sinti satisfakshon den nos bida  ku nos ta logra nos metanan en general. Formanan ku nos por krese den nos stabilidat  emoshonal den nos bida ta dor di logra balansa, den emoshon, palabra, nos relashonnan sosial I metanan ku nos kier logra.

Aspektonan pa tene kuenta kuné ora di kuida bo emoshon?

Bo emoshonnan ta enserá entre otro:

kon optimista abo ta

kuantu amor propio bo ta sinti

kuantu aseptashon propio bo ta eksperensia

kon bo abilidat ta pa por ekspresá I kompartí bo sentimentunan

Tips pa Kuida bo emoshon

Sea konsiente di bo emoshon I reakshon semper

Ekspresá bo mes I e forma kon bo ta sinti bo den bo komunikashon

Pensa promé ku bo aktua voral na momentonan kubo ta rabia

Maneha e kantidat di stress den bo bida diario

Buska e balansa den kada dia

Mantené kontaktonan sosial ku hendenan ta laga bo sinti kontentu

Dia 20 di mei Kuida Kurpa lo tei bek den korant Extra ku otro kolumna kaminda nos lo trata e impakto di kambio grandi I inesperá manera Covid-19, riba nos emoshonnan.

Pa mas informashon general di Kuida Kurpa, òf pa hasi pregunta, libremente aserka nos via di email kuidakurpa@gmail.com, sigui nos via Instagram kuidakurpa.cw of facebook kuidakurpa.cw

Semper kòrda di Kuida Kurpa!