WILLEMSTAD.- Djasabra 27 di novèmber, su altesa Prinsesa Beatrix a kuminsá su mainta ku un rekorido na parke di Mangrove. Einan el a keda risibí entre otro pa minister Cooper ku a duna un splikashon di e proyekto asina importante pa Kòrsou pa nos lokalnan i pa turistanan. Mas aleu a sigui un sera konosí na e Wijkvoedselbos Brievengat. Na e bishita aki, rondoná pa nos chikitinnan su altesa Prinsesa Beatrix a tuma nota di e proyekto di plantamentu den bario.

Despues a sigui bishita na Casa Manita i a terminá e anochi na katedral di sumpiña na landhuis Bloemhof, pa sera konosí ku e proyekto di arte gigantesko aki.

Djadumingu, 28 di novèmber 2021 Su Altesa Real Prinsesa Beatrix i Gobernador Lucille Wout-George  a kombersá ku algun hóben tokante un mundu ideal despues di Covid. Despues e Prinsesa i Gobernador a hasi un rekorido den e hardin di arte di Blue Bay Resort Curaçao. Di e forma aki Prinsesa Beatrix a kulminá su bishita di trabou na Kòrsou.

Kombersashon ku hóbennan den Octagon

Meskos ku nos adultonan, COVID tin un impakto tambe riba bida di nos hóbennan. Pa e motibu aki UNICEF huntu ku Gobièrnu di Kòrsou a pidi algun hóben pa yuda pensa i duna nan opinion tokante asuntunan ku ta regardá nan situashon. Durante diferente kombersashon ku Prinsesa Beatrix e hóbennan a ekspresá e efekto ku COVID tabatin riba nan. Tambe nan a kombersá kon nan kier mira progreso den futuro. E kombersashonnan a tuma lugá den e edifisio históriko yamá Octagon na Avila Hotel

Rekorido den hardin di Arte

Despues di Octagon, Prinsesa Beatrix a bishitá Blue Bay kaminda ku artistanan lokal a haña chèns di presentá nan arte trahá di artíkulonan resiklá ku e meta pa sigui konsientisá hende riba kuido di nos medio ambiente.

Pa konkluí Prinsesa Beatrix kende ta tantu ‘beschermvrouwe’ di Dutch Caribbean Nature Aliance (DCNA) i di e proyekto di pa hóbennan partisipá (UNICEF) a kulminá. A logra pone atenshon riba konsientisashon kuido di medio ambiente. Tambe a pone atenshon riba kon pa superá e konsekuensianan di e efektonan di COVID.