Libertat kondishonal a bira maksimal 2 aña

WILLEMSTAD. - DEN HAAG. - For di promé di yüli un kondenado no ta bin mas na remarke outomátikamente pa libertat kondishonal (VI) despues di sinta 2/3 parti di e kastigu imponé. E lei aki a drenta na vigor na Hulanda dia promé di yüli último.

Despues ku a introdusí e ‘Lei Kastigu i Protekshon’ e libertat kondishonal a bira maksimalmente 2 aña.

Ántes tabata asina ku libertat kondishonal tin biaha tabata yega te ku 10 aña, esta e kondenado ta haña libertat pa motibu ku el a sinta 2/3 parti di su kastigu, miéntras ku 10 aña ta keda kologá riba su kabes. Na Hulanda esaki no ta ba vigor mas.

Minister di Hustisia hulandes Dekker a duna di konosé ku kastigu ta kastigu.

Banda di esei no t’asina ku un kondenado outomátikamente ta bin na remarke pa libertat kondishonal. Konforme e lei nobo  Ministerio Públiko tin di evaluá komportashon di kada prezu i den un forma individual por disidí riba libertat kondishonal, ora esaki yega asina leu. Konforme e lei nobo, esaki ta maksimal 2 aña.

Promé ku duna e libertat temporal, lo evaluá algun aspekto, esta komportashon di e prezu, e interesnan di e víktimanan i e peliger ku tin pa komunidat.

Minister Dekker a splika ku un kondenado ku rekobrá libertat, miéntras e kastigu imponé ta severo, ta duna un sintimentu  di inhustisia i no ta kos ku por hustifiká pa ku e víktimanan.

P’esei a kambia e lei aki i a Sali for di e punto di bista ku kastigu ta kastigu. Pa evitá ku un kriminal ta bolbe kai den fayo, for di e promé dia den prizòn e mester ta aktivo i ku un bon komportashon.

Pues no ta solamente e aspekto di libertat kondishonal ta kambia, pero e prezu su forma kon el a yena su dianan den prizòn ta konta, prinsipalmente kon e focus pa e pone su bida riba e bon kaminda, ta hunga un ròl importante.

Pues e prezu su komportashon lo influensiá e privilegio ku e lo haña. Pa duna un ehèmpel, durante e medidanan relashoná ku COVID-19, prezunan tabata haña bishita, pero tras di glas i esaki a pone ku no tabata fásil pa hinka kosnan ilegal den prizòn. Pero si haña un prezu ku kosnan ilegal den su poder, por lo pronto e lo por risibí bishita solamente tras di glas, esaki ta e forma konta evaluá e privilegio ku e prezu lo haña ora e ta será.

Pues pa logra libertat temporal, komportashon di e prezu mester ta hopi bon, mester tin un meta konkreto pa re-integrá den komunidat, dor di sigui kursonan ku éksito den komunidat.

Pa logra metanan spesífiko pa e prezu por drenta bèk den komunidat, for di prinsipio reclassering lo ta envolví  ku nan plannan.