WILLEMSTAD.- Maske tin hopi hende ku lo ta fadá di mira i tende kon Kunuku Man i su grupo ta kana limpia rònt Kòrsou, nos ta sigui mustra riba komportashon dje un grupo den e poblashon akí ku no por mira lus di dia. Tin un grupo ku ta simplemente porko i ta yega un dia ku nan lo ser eksponé. E siman akí Kunuku Man i su grupo di boluntarionan a bolbe bai den e aria di SVB na Rif ku ta praktikamente den porta di Megapir i tambe Hotel Renaissance, pa asina tene nos kara limpi pa e turista tin un mihó impreshon.

Riba e djadumingu akí nan a rekohé no ménos ku 205 bòter di serbes bashí, ku a pisa 41 kilo, ku a bai pa banko di glas; tambe a piki un kantidat di 225 bleki di aluminio, ku a pisa 3 kilo i ku a bai pa resiklahe; tambe a deshasí di un kantidat di 300 bòter i otro artefaktonan di plèstik, ku a pisa 6 kilo i ku tambe a bai pa resiklahe serka Green Pheenix. E sobrá shushi komun ku a pisa 84 kilo a bai landfill. Tur esaki a akumulá pa un peso total di 134 kilo di shushi. Esun ku no por soportá e bèrdat, ta mesun kulpabel ya ku lo bo ke bira kara pa un krímen ku ta ser hasí kontra nos isla.