Na Wespen, te riba seru Branda Elvis Alberto i su famia tin un plantashon kual nan ta biba di dje. Elvis ta dediká su mes na plantashon i konsientisá hende pa planta i pa biba un bida salú. Bayendo bèk den historia Elvis a konta Djasabra mi su tawela Jo Delannoy kaminda el a lanta tabatin kunuku i kria karné. I for di chikí Elvis a siña traha kunuku serka su tawela. Antes tabata asina ku tur mucha mester a siña traha kunuku pasobra esei tabata e parti importante den bida. “Si bo no por traha kunuku, bo no por buska kasamentu, pasobra ta kiko lo bo duna e señora kome”, Elvis a konta ku un sonrisa. I p’esei for di chikí el a siña traha kunuku i henter su bida te awor e ta planta tur aña kunuku den temporada di yobida ku ta di òktober pa bai febrüari/mart ora kue kosecha.

Di kunuku pa krio di bestia

Den époka di yobida, segun Elvis, nan ta biba di e kunuku i e otro parti ta e manera di bida ta ku ta kombiná plantamentu i krio di bestia i tapamentu di karné. Asina grandinan tabata drei ántes, esta ora ta temporada di yobida ta planta i ora di sekura ta kria bestia i tapa karbon. Asina e ekonomia tabata drei. I esei ta loke Elvis ta hasiendo. I banda di dje e ta duna lès na gruponan i na kas di kultura na Museo Tula na kenepa kaminda ta duna lès di agrikultura.

Kon ta prepará un tereno; e promé parti ta konosé bo tera, kon bo tera ta por ehèmpel na Wespen ei e ta na seru i ora ta traha na seru mester traha ku faha di piedra òf dam di pieda esaki ta ora awa kai e no laba tur e tera bai kuné. I asina ta planta den e dam òf faha di piedra i haña kosecha. Tambe mester sa ki temporada ta planta kunuku. Tin hòfi i tin kunuku; den kaso di hòfi bo ta planta henter aña pasobra ta usa awa di pos pero den kaso di kunuku ta temporada di òktober pa febrüari ta planta ku awa ku ta yobe di shelu. I einan ta planta bonchi kunuku, patia, maishi chikitu, maishi grandi, pinda, milon, tur produkto di tera di Kòrsou. Ougùstùs i sèptèmber ta e dos lunanan ku ta prepará e kunuku, ta limpia e tereno, limpia kanalnan, si tin mèst basha den e kanalnan, prepará e tera pa ora awa yobida. Bieunan ta bisa ku bo tereno mester ta kla prepará pa sembra por lo ménos 15 di sèptèmber pasobra e awa por bini un tiki tempran.

Awor aki debí na kambio di klima no ta asina presis e awa ta kai pero ántes si por a konta esei Tin hende ta usa mashin pa plug pero Elvis semper a usa chapi, kaminda e ta plug pa planta maishi chikí i maishi grandi, bonchi kunuku, pampuna i ya for di desèmber e ta kuminsá kosecha bonchi kunuku i asta wandu. Tambe kònkòmber chikí (Mosa) por a kue for di desèmber. I asina ta planta durante di e époka ei.

Simia orgániko

Elvis a sigui bisa ku promé ku Shell a bin, nos hendenan tabata biba di plantamentu, piskamentu i krio di bestia. Pero ora Shell a bini, ofresiendo e hendenan salario mas lukrativo, esei a pone e hendenan a Sali for di nan plantashon, krio di bestia i peskeria pa bai traha na Shell. I p’esei no tabatin asina tantu produkshon mas., Pero awor aki atrobe tempu ta kambiando, tin hopi desempleo, kompanianan grandi ta sera i hendenan ta bai bèk na plantashon. Manera un minister a yega di bisa, agrikultura awor aki no ta un opshon, pero ta un sobrebibensia. Sientifikamente ta probá ku esun ku ta planta ta kuida su salú. Hende tin di bai bèk na planta orgániko, bai bèk na planta ku simia. Pa por planta mester di bon simia. Elvis ta kòrda tempu di su tawela, ora kòrta patia ta bisa tur mucha pa warda e simia, pasobra mester di e simia aki. Den plantashon e punto importante ta simia i simia orgániko i no simia manipulá.

Un simia ku ta manipulá bo ta plant’é un biaha. Ora e simia ta manipulá e por daña bo tera i esei ta pone ku hopi agrikultor rònt mundu ta kai den krísis pasobra nan noi tin simia orgániko. I bayendo den direkshon di salu, Elvis a bisa ku agrikultura i salú ta lenk ku otro, Nan dos ta masha importante. E loke agrikultura ta produsí ta dependé di salú di e pueblo. Henter un pueblo ta bira malu di nan kome produktonan ku ta bin di simianan manipulá (GMO’s). P’esei ta importante pa agrikultura na Kòrsou kuminsá ku un simia bon pa no daña ni tera ni salú di hende. Kuminsá planta no pa bende pero kuminsá planta pa tin alimentashon ku ta bon pa salú.

Agrikultura moral

Elvis su lèsnan semper ta karga komo título Agrikultura Moral i einan ta mustra e importansia di simia. Simia mester ta orgániko i no manipulá sino ta hasi daño na hende su salú djis pa haña sèn. Naturalesa ta bisa ku kos mester keda den balansa i harmonia. No hasi nada ku ta hasi daño na naturalesa. Meskos ku e faha di piedra ku ta traha na rant di seru el a bisa ta pa wanta tur sushi ku ta bini for di seru. I e awa ku ta yega bai abou ta un awa limpi limpi. Esaki ta nifiká ku ta kuida naturalesa i no ta laga kunuku ku tin di usa e awa ku ta baha di seru, ta laga un awa sushi pasa bai laman i einan hasi daño na koralnan i bestianan den laman. I p’esei e agrikultura orgániko ta importante i esei ta netamente loke nos bieunan tabata hasi. I tin hende ta kere ku nos bieunan tabata hende bobo. Ta hendenan ku konosementu i awendia hopi di nos no a tuma over pa por sigui kuné. I e tempu a yega pa nos pone den práktika tur e konosementu ku nos bieunan tabatin i ban planta di e sistema den harmonia ku naturalesa pa traha un agrikultura moral.

Kon mi por sa ku e pipita di patia ku mi ta kome ta orgániko? Riba esei Elvis a splika ku por tèst e simia den fábrikanan pero e manera ku por hasi na kas ta planta e simia i konserv’é den hèmber i lag’é produsí. I si e produsí bo ta bolbe planta e simia ei i si e no produsí ta nifiká ku e no ta orgániko. Produktonan ku por tèst e balor di e nutriente di e fruta mester ta kuadra ku midimentu. Esta midi su djus pa mira si e ta kuadra ku rekerimentunan di e fruta i asina ta sa ku e ta bon. I p’esei esun ku ke planta, Elvis lo konsehá pa e buska simia serka esun ku ta planta orgániko.

Hopi konosementu pero di unda; Elvis Alberto a kria den kunuku i a haña hopi konosementu di su tawela ku tabata  e parti básiko. Su tawela tabatin plantashon Po Palomba i otro kunuku na kòrta pe e kaminda di bai Kenepa. I riba seru di Branda tambe. Despues ku Elvis a bai traha, el a bai Venezuela na 1989 pa studia naturismo i agrikultura. I despues el a bai California kaminda el a studia Preventive Health Care. Einan el a studia histologia, anatomia i fisiologia. Esta kon hende su kurpa ta hinká den otro i kua ta e mihó kuminda pa kurpa. Despues di California el a bai Alabama kaminda el a hasi estudia nutrishon i a bai traha na Oropa entre otro na Ulanda, Bèlgika i Alemania kaminda el a haña mas konosementu. Elvis a keda biaha tur aña kaminda e ta bai sigui e último desaroyonan den mundu di salú i agrikultura.

E kos mas importante pa Salú; Manera un investigashon sientífiko ku a keda hasi, Elvis a splika, na Universidat na Merka, nan a bin ku e palabra “Newstart” Kada palabra tin un nifikashon. E N ta pa nutrishon, E ta pa ehersisio, W pa Water, S Sunlight, T Temperance, A Air, R Rest, T trust. E 8 puntonan ei ta e prinsipionan/leinan di salu ku si nos obedesé nan outomátikamente nos lo tin bon salu. Pa bo tin salu bo  ‘lifestyle’ mester ta den harmonia ku e 8 prinsipionan menshoná. Un bon alimentashon i ora bo tin un bon alimentashon, sanger limpia hasiendo bon ehersisio, ta importante pa bebe 8 te mas glas di awa pa dia, lus di solo, ‘temperance’ ta usa moderadamente loke ta bon i apstené loke ta malu, aire ku ta importante pa nos respirá i oksigená sanger. I esaki ta dor di ehersisio, drumi ku bon ventilashon. Sosiegu i deskanso ta ku nos mester sosegá por lo ménos 7 pa 8 ora pa dia. Asina solo baha drenta den ambiente di sosiegu. I ta sientífikamente probá ku 2 ora promé ku 12 or di anochi ta nifiká muchu mas ku 4 ora despues di 12 or. Ku esaki Elvis a splika ku ta importante pa drumi 2 ora promé ku 12 or di anochi pa e mente por “recharge”. I si pèrdè e 2 oranan ei bo no ta rekuperá fásilmente. I tambe konfiansa ta importante pa tin éksito den bida. I e 8 puntonan ei ta asina profundo. Hendenan ku ta práktika e 8 prinsipionan ei ta biba 11 aña mas largu ku esnan ku no ta praktik’é i ta baha e rísiko di haña kanser, atake di kurason etc., etc.

Planta for di den hèmber

Na kas por planta for di den un hèmber di 5 galòn, bai mitar drùm òf kahanan. I si tin tereno ta traha kama i planta, teniendo na kuenta kapasidat di awa. Por planta hopi kos. Nos hende grandinan tabata planta den nan kunuku ántes. I hende muhénan tambe tabata traha den kunuku. Na Kòrsou por produsí bon produkto pasobra tin bon solo aki i si áwaseru no kai por resiklá e awa di kushina.

bienestar di bon salú

Salu ta un bienestar físiko, mental, spiritual, sosial i material. Salú ta e rikesa di mas grandi ku nos tin i nos mester pone atenshon na nos salú. Usa nos inteligensia den tur loke nos a kome i bebe. Rasoná bon ora ta bai kome i bebe algu pa wak ki benefisio kurpa tin di dje. Asina ta pensa i rasoná i pa por tin bon salú. I problema di mas grandi ta e komementu awendia ku no ta den harmonia ku e prinsipionan di salú. I malunan ta bini di loke ta bin di e sistema digestivo. Kome bon i balansa strès.

 Kontaktá Elvis

 For di 1991 Elvis ta duna lès, charla, bishita sentronan di bario, famianan i hende por yam’é i hasi sita i e ta duna lès i splika e puntonan importante di salú i agrikultura. Por tuma kontakto ku Elvis na 669-3016.