WILLEMSTAD.- CHATA ta preokupá ku e situashon ku Kòrsou ta pasando aden i manera nan ta bisa, nan no sa kon largu mas e sektor di turismo lo por wante.

CHATA, komo organisashon na bienestar di turismo i hospitalidat di Kòrsou, a tuma nota di e medidanan aktual i e situashon krítiko ku nos ta konfrontá. Niun hende no a spera ku nos ekonomia lo a hañ’é enfrentá ku un segundo lockdown parsial. Sinembargo, esaki ta nos realidat.

“Sektor di turismo i hospitalidat promé ku COVID tabata 40% di nos ekonomia. Den e último dies añanan e sektor a krese i bira e pilar ekonómiko di mas grandi na Kòrsou (asta mas grandi ku sektor finansiero) i ta brinda alrededor di 16.000 kupo di trabou ounke kisas tin algun ku no ta realisá esaki. Pa e motibu aki nos ta yama nos sektor e kurason di Kòrsou. E motor ekonómiko ku ta hasi mas ku simplemente pone pan riba mesa pa hopi famia riba nos isla”, segun Direktor General di CHATA, sra. Maria-Helena Seferina.

A konsekuensia di e lockdown (ounke ta parsialmente) nos ta den un krísis grandi. Hotèlnan i diferente empresa i proveédónan ligá apénas tin entrada i ta drai hopi pèrdida. Empleadonan mester bai kas temporalmente i asta tin ta pèrdè trabou kompletamente, ku tur e konsekuensianan sosial-ekonómiko ku esaki ta trese kuné. Sin mas, segun presidente di direktor general di CHATA, nan ta komprondé ku e medidanan drástiko aktual ta nesesario i na bienestar di salú públiko. Pa e motibu aki tambe CHATA ta enfatisá nan kompromiso i koperashon pa kumpli ku e medidanan.

Un Kòrsou sigur i safe ta lo mas importante pa nos komunidat i nos ekonomia i alabes un prioridat pa turista ora nan ta skohe nan destinashon di vakashon. Huntu ku partnernan CTB, TUI, CAP, KLM, C15, CASHA i CRA ta spera ku de-eskalashon di medida pronto ta posibel, manera entre otro drive-thru i/o curb side pick- up na restorantnan pa asina por bolbe atraé turista den un forma safe.

CHATA i e partnernan menshoná ta ofresé gustosamente kualkier sosten i koperashon den esaki. Sinembargo CHATA ta di opinion ku un plan di reskate aselerá ta nesesario pa evitá un kaida kompleto di sektor ku konsekuensia di aun mas desempleo.