Dor di ekseso di kalor

El a keda transportá ku helikòpter di Wardakosta pa CMC

WILLEMSTAD.- Ayera den  oranan di djadumingu Sentro Operashonal Marítimo (MOC) di Wardakosta di Karibe, a risibí un petishon di Kuerpo Polisial, pa asistí ku búskeda di dos turista hulandes.

Ta trata di dos ruman muhé ku a pèrdè den besindario di e 'zoutpannen' di Jan Thiel.

Inmediatamente a pidi asistensia di e helikòpter di Wardakosta. E personal di Wardakosta den e  helikòpter, despues di un ratu, a logra lokalisá e dos rumannan.

Esaki a pone ku nan a aterisá mesora pa duna e asistensia nesesario.

E temperatura i kalor a afektá un di e señoranan (67 aña di edat) di tal manera, ku konsekuensia ku su kurason a stòp di bati.

Personal di e helikòpter a logra reanimá e señora i a transport’é ku urgensia pa aeropuerto Hato.

Personal di ambulans a risibí e señora den estado krítiko i a hib’é inmediatamente pa risibí tratamentu médiko mas avansá na CMC.

Huntu kuné e ruman muhé tambe a keda transportá pa CMC.