Informashon ku EXTRA a kompilá danki na bosero di Kuerpo Polisial ta indiká ku e kurpa sin bida ku a keda deskubrí awe mainta den área di Skarlo, pega ku Curoil, ta un hende hòmber. Ta trata di un persona nase na Kòrsou di sekso maskulino manera EXTRA a informa anteriormente.

Bosero di polis a indiká ku no a tuma e kurpa den beslag.

Mas aleu por a komprondé outoridatnan ta hasiendo e trámitenan pa notifiká famia di e defuntu ku ta den eksterior.

Kurpa sin bida den área di Skarlo

WILLEMSTAD.-Na e momentunan aki esnan ku ta trafiká den área di Punda, Waaigat i spesífikamente Skarlo lo por a nota basta moveshon ku polisnan den e área. Ta asina ku awe mainta pa mas o ménos 5 minüt pa 6’or sentral di polis a haña notifikashon ku tin un persona riba e lugá di parker outo di e kompania Curoil i ku e persona no ta reakshonando. A manda un patruya na e sitio i e polisnan por a konfirmá ku e persona no ta duna señal di bida.

Mesora a pidi presensia di e departamentu forénsiko di polis, dòkter di polis i e patólogo di manera ku por inisiá e investigashon den e kaso aki. Ta trata di un persona si sekso maskulino, asina bosero di polis Luis Curiel a informa EXTRA. Investigashon di EXTRA ta duna ku ya kaba nos tin nòmber di e persona pero nos ta laga outoridatnan kumpli ku e parti di informa famia promé ku publiká esaki. Keda pendiente pa mas detaye di e kaso.