WILLEMSTAD.- Faysuri's Nails Academy ta e úniko akademia aki na Kòrsou ku a risibí lisensia serka ministerio di enseñansa, siensia, kultura i deporte, e lisensia aki ta trata tur loke ku ta kuido di man i pia. Faysuri's Nails Academy ta duna kurso di kuido di man, kuido di pia i tambe kreashon di struktura. E akademia tin 4 aña kaba kargando e lisensia aki, nan meta ta pa forma profeshonalnan ku por sali eifó, i haña trabou na kualke salòn òf kompania, i asta lanta su propio negoshi riba e tereno di uñá.
Djasabra último tabatin presentashon di 3 kursista ku a sigui kurso na e akademia. Nan mester a presentá nan proyekto final ku ta un “full set” di uñá basa riba un modèl ku nan mes a bini kuné. E kursistanan mester a mustra ku kiko nan a traha e uñá nan i tambe splika kiko a inspirá nan pa skohe e tema ku nan a uza pa ku esaki.
Aktualmente nan tin 9 kursista ku a terminá e kurso di "nails techinician". E kurso aki a dura 10 luna, i na final nan lo risibí nan diplomá. Durante di e presentashon di djasabra último, por a tuma nota di kuantu talento Kòrsou tin, i ku den e mundu di uña tambe tin hopi kreatividat.
For di 2021 ku Faysuri's nails academy a risibí e lisensia, nan a kuminsá duna kurso i e aña aki nan ta bai tin nan di 3 entregamentu di diploma pa kursistanan ku a sigui kurso di kuido di man i pia serka nan, spesialmente den e parti di hasimentu di uñá.
Tur persona ku tin pashon pa e arte di uñá lo por tuma kontakto ku nan òf bishitá nan pa asina tuma informashon i apliká pa e kurso. Por bisa ku esaki no ta mara na edat pues tur persona ta bon bini.