WILLEMSTAD.- Ayera nochi a tuma lugá e sertámen di Miss Kòrsou. E sertámen ku a tuma lugá na Santa Barbara Resort a konta ku un sala yen di públiko ku a bai animá nan kandidata preferí.
Un total di 6 kandidata a kompetí den e sertámen, Ysatis Lacle; Chantal Wiertz; Liane Bonofacia; Kyrsha Attaf; Dennice Seinpaal i Aushantaly Jamanika.
E evento ku e biaha aki a keda produsí konforme e konsepto pa televishon a keda transmití pa Televishon Direct a kana bon ounke ku na algun okashon nan no tabata kla pa por a sigui ku e show mesora loke a pone ku e transmishon mester a wòrdu adaptá.
‘DEN E BEMBE’ mester remarká ku un biaha mas e kandidatanan a lusi suak na momentu di kontestá pregunta den e di tres presentashon. Otro punto tambe ku tabata remarkabel ta e tapijt bèrdè ku a usa pa dekorá rondó di e skrinnan LED riba stage.
Premionan individual
E sertámen a parti tres premio individual ku tabata Miss Fotogénika, Miss Internet i tambe Miss Elegansia, tur tres premio a keda gana pa Kyrsha Attaf.
Finalistanan
E tres finalistanan a resultá: Kyrsha Attaf, Liane Bonofacia i Chantal Wiertz.
Despues ku a skohe e tres finalistanan a bin un rònt di pregunta kaminda tur 3 kandidata a risibí mesun pregunta.
Kiko ta bo definishon di éksito? tabata e pregunta ku e kandidatanan mester a respondé.
Despues di pregunta a bolbe tuma basta ratu promé ku e resultado final a bira konosí.
Premiashon
Komo segundo finalista a keda premia: Liane Bonofacia; Promé finalista: Chantal Wiertz i
Krysha Attaf a keda koroná komo Miss Universe Curaçao 2019. Pabien na nos Miss Universe Curaçao i e finalistanan.
E sertámen di Miss Universe ta tuma lugá dia 19 di desèmber 2019 na Sur Korea.