WILLEMSTAD.- LabdeMed tin sufisiente hende pa atendé tur e klientenan ku ta akudí últimamente pa tèst spesialmente kontra Covid-19. E direktor Rudy Le Blanc a bisa ku e peso naturalmente ta baha riba un grupo di persona i p’esei nan ta purbando atkerí personanan ku por yuda karga e trabou i nan ta sòru pa tin ekiponan adekuá den kas pa akapará e volúmen aki tambe di tèstnan ku ta biniendo.

LabdeMed tambe tin e bus pa bai kaminda hende ta i pa hasi e tèstnan nesesario. Esei ta loke LabdeMed ta ofresé tambe, esta e servisio spesial kaminda nan ta bai kas i na diferente sitio, hotèlnan i kaminda e hende tin nesesidat pa hasi e tèst. Tambe nan prekmentu na kas aki a subi supstansialmente, pasobra hendenan no ke Sali bai kaya. LabdeMed semper a traha riba e servisio ku nan ta bai duna e servisio te na kas. I p’esei nan lema “si bo no por yega serka nos, nos ta yega serka bo”. I esei nan ta konsiente di e situashon pekuliar ku ta biba, i nan ta sòru pa por duna e servisio na pashèntnan den nan kas, den nan ambiente, di forma konfortabel.

Pa hasi esaki sr Le Blanc a bisa ku nan ta sòru pa nan ta bon protehá, ora nan yega, nan tin e gear spesial, maskara, tapa kabes i ta bai ku asta maskara pa por  si akaso e persona no tin na kas i nan ta desinfektá debidamente i trata asina ku ta protehá e persona enkuestion i nan empleado.

Sigui medidanan

Teniendo na kuenta dianan di fiesta den porta, hopi hende ku gana di Sali kas bai laman i ta den ambiente di fiesta. Sr Rudy le Blanc sinembargo ta pidi pa sigui e direkshon di gobièrnu. Loke ku gobièrnu ta indiká e medidanan ku ta bini, nan no ta leuk, nan ta fèrfelu pero ta pa nos mes bon. Nos mester sigui nan, si nos ke konhuntamente yega na un punto ku nos ta liberá nos mes mas tantu posibel di e vírus aki.

E vírus ta kaba na momentu ku e no por sigui propagá su mes. I e manera ku e ta propagá su mes ta den hende. E ta bai di hende pa hende. dado momentu si por limitá mas tantu posibel e kontakto físiko ei i prevení pa bai den grupo grandi di hende, asina por baha e situashon di infekshon i ku mas lihé posibel konhuntamente por Sali for di e situashon aki.

E ta afektá kasnan di famia, e ta afektá ekonomia, e ta afektá diferente área di nos bida ku dado momentu nos no ta biba normal mas. I mester yega na e punto ku nos por bai normalisá. Sr Le Blanc ta konsiente ku e situashon aki tin su efektonan hopi fèrfelu pa nos komunidat.

(Foto FB LabDeMed)