WILLEMSTAD.- ‘Lachgas’ ta un supstansia popular bou di hóbennan prinsipalmente. Tin tempu e ta subi di uso i tin momentu e ta baha, pero su presensia tei. E ta hopi usá kaminda tin aktividatnan festivo, sea na kas òf den un klup. E uso di ‘lachgas’ a progresá di tal manera ku aktualmente tin hende ta sòru pa nan tin nan tanki di ‘lachgas’. Na aktividatnan e hóbennan tin nan tanki di ‘lachgas’ i nan saku di blas. Nan ta yega na un aktividat, yena nan blasnan i ta kompartí ku otro òf te asta bende ku otro. E ta algu hopi usá bou di hóbennan. Esei di akuerdo ku sra. V. Betrian di Fundashon pa Maneho di Adikshon (FMA) durante un presentashon ku el a duna na Parlamento e siman aki.

Segun sra. Betrian, e uso di ‘lachgas’ ta asina popular ku den promoshon di kualke fiesta di hóbennan menshon ta ser hasí tambe ku lo tin ‘lachgas’ disponibel, pues tur sorto di kos pa atraé e hóben na un aktividat.

Kiko ta ‘lachgas’?

“Lachgas” no ta manera helium ku si bo inhal’é e ta kambia bo bos. Den términonan kímiko e ta ser konsiderá komo ‘distikstofmonoxide’ òf N2O. Originalmente e ta un supstansia ku sa usa den e mundu medisinal òf den kushina òf den motor di outo (Nitro) pa un mihó prestashon. Den e mundu medisinal e ta ser usá komo un sorto di sedante (verdoof).

Pero e ‘lachgas’ ku ta ser usá popularmente ta ser kombiná ku oksígeno pa evitá ku e por afektá bo selebre. Pero lamentablemente e forma di ‘lachgas’ ku hóbennan ta usando no ta kontené sufisiente oksígeno. E tin un smak poko zut, loke ta hasié atraktivo. Pero e forma aki di ‘lachgas’ por ta dañino pa salú di hende. E forma kon ta us’é ta lo siguiente: Ora ku bo haña e blas ku ta kontené e ‘lachgas’, bo ta inhalá esaki, despues bolbe supl’é bèk den e blas. Bo ta ripití e akshon ei te na momentu ku bo sinti un tiki haltu.

Na momentu ku e hende usa e ‘lachgas’ e lo eksperensiá kosnan otro, bo ta mira i skucha e kosnan otro. Pero e tin efekto di algun minüt, i e ta sali for di bo sistema. Segun sra. Betrian, e kos ta ku hopi hóben ta balotá konsekuensianan di ‘lachgas’. E durashon dje efekto por ta kòrtiku, pero dor ku bo kurpa ta pèrdè sensashon, bo por hasi bo mes daño. Ademas no lubidá ku bo selebre ta haña ménos oksígeno, i esei ta un peliger; e ta afektá bo sistema nèrvioso sentral.