WILLEMSTAD.- Den términonan general por bisa ku krímen a baha aki na Kòrsou. Den diferente kategoria sifranan ta mustra ku kosnan a kalma, hustisia tin mas kontròl riba e situashon. Pero Minister di Hustisia demishonario mr. Quincy Girigorie tin di rekonosé ku ladronisia di outo si a pasa su forsa. Den entrevista ku EXTRA a mandatario a duna di konosé ku un dje krímennan ku mas tin e komunidat aki kompletamente frustrá ta e ladronisia di outo.

Segun Girigorie, e kantidat di kasonan dje aña aki no ta tantu kompará ku añanan 2015 i 2016, pero kada un kaso ta di mas. Tin añanan ku a registrá mas di 500 outo hòrtá. Na 2019 e loke a registrá tabata mitar, e por zona ménos pero e ta demasiado pa un komunidat chikí manera esun di nos.

E tin di rekonosé ku ladronisia di outo no ta un problema ku hustisia tin grep riba dje ainda. Pero e problema ta sinta den e echo ku tin merkado pa loke ta ser hòrtá. Ademas komunidat ta mira e problema aki muchu komo un problema di polis. Kada ken mester para ketu i realisá ku polis no por evitá ku bo outo ta ser hòrtá. E problema ta sinta den e aparato rondó di polis.

Polis no por evitá sin mas ku nan ta hòrta bo outo, pero loke si polis por hasi ta di kibra e kadena i hasi e merkado ménos atraktivo. Loke ta bai hasi ta, ku un piesa di outo no sin mas por ser pegá riba un otro vehíkulo. Esei ta pone ku e merkado ta bira ménos atraktivo pa loke ta hòrtamentu di outo. Den esaki tin envolvimentu di SOAB, Keuringslokaal, Ministerio di Finansa, pero tambe importadónan di outo i di piesa.

Pa duna un ehèmpel: Antes un dje marka di outonan ku tabata hopi solisitá ta Toyota. Den konsulta ku polis, agensia di Toyota a disidí di baha nan preis di piesa. Esaki a pone ku hòrtamentu di outonan Toyota pa kita piesa ya no tabata atraktivo.

Pero awor gobièrnu ta riba un trayekto huntu ku SOAB pa sera e sírkulo i baha ladronisia di outo i hasié ménos rendabel. Un biaha mas segun sr. Girigorie, e tin di rekonosé ku esei ta algu ku a no a logra dominá. Tin desishonnan ku a pasa kaba, tin fondonan disponibel pa ehekutá e trayekto aki. Pues e no ta duda ku e próksimo titular di hustisia lo kontinuá kuné.