WILLEMSTAD – Un biaha mas ladronnan un sla grandi kontra di komersio, e biaha aki na un pòmp di gasolin na Emmastad, kaminda nan a logra di drenta den e negoshi i bai ku tur e sèn ku tabata den e kaha fuerte.

Segun informashon ku EXTRA a risibí, e malechornan a destruí e kámaranan di seguridat i kòrta e sistema di alarma promé ku nan a kuminsá ku nan akshon. Despues nan a hasi uso di mashinnan pisá, posiblemente e mesun ekiponan ku a keda hòrtá anteriormente for di Brantwer, pa bres e porta di e negoshi i habri e kaha fuerte. E malechornan a logra di bai ku tur e plaka i te na e momentu aki no ta konosí kuantu sèn nan a logra di hòrta.

E robo aki ta lanta pregunta si tin relashon ku e robo ku a tuma lugá durante fin di siman na negoshi Leañez, na parke industrial di Seru Lora, kaminda ladronnan tambe a logra di habri un kaha fuerte i bai ku un suma grandi di plaka.

Tin sospecha ku e malechornan por ta hasiendo uso di e ekiponan pisá ku a keda hòrtá for di Brantwer, pero te awor no tin konfirmashon ofisial ku ta trata di e mesun ekiponan ni ku e dos robonan tin relashon ku otro.

Na e momentu aki polis ta presente na e pòmp di gasolin na Emmastad, kaminda nan ta hasi investigashon pa determiná kon e robo a tuma lugá i trata di identifiká e responsabelnan. E investigashon ta kontinuá.