WILLEMSTAD.- Lei di Bion no a duna e resultado ni efekto ku a spera di e lei aki, esta di stimulá empleo bou di hóbennan. No tin sifranan ofisial riba e partikularidat ei, pero for di kanalnan inofisial por komprondé ku e kantidat di hóben ku a haña un empleo a base di Lei di Bion ta un tristesa, hopi abou. Asina SER ta bisa den s komentario riba e inisiativa di lei pa krea empleo pa hóbennan. Pa medio di proyekto di lei aki e hóben ku haña un trabou di por lo ménos 6 luna lo por haña eksonerashon den pago di loonbelasting i primanan sosial. MFK ku ta esun ku a entregá e proyekto di lei aki ta kere ku esaki lo por ta unu ku ta bai mas leu ku e Lei di Bion ku a ser introdusí komo diessinku aña pasá i tambe inkluyendo insentivonan pa empresarionan duna empleo na hóbennan.

SER ta bisa ku ta bon pa esnan ku a bini ku e inisiativa di lei komprondé si ku su éksito ta dependé di e instrumento fiskal, i tambe di e bentahanan ku e dunadó di trabou ta spera di haña kontra e gastunan, i den e sentido mas amplio di palabra. Sin mas si nan lo ser konfrontá ku un reto pa hisa e partisipashon riba merkado laboral na hóbennan desempleá i tambe hóben adultonan. Pues ta surgi e pregunta te kon leu den kuadro di e maneho di personal lo duna prioridat na asuntunan manera merkado laboral inklusivo i durabilidat.

Sinembargo SER ta haña ta masha remarkabel ku den debatenan riba kombatimentu di desempleo hubenil te awor no a hasi un evaluashon di e Lei di Bion. Es mas, e kantidat di hóbennan ku finalmente a haña un empleo bou di e régimen di Lei di Bion, aparentemente segun SER por a komprondé for e di informashonnan no ofisial, ta hopi abou i ku ta un tristesa. SER no a logra haña sifranan ofisial, i esei ta bisa hopi di e efektividat i supervishon i kontròl ku mester tabatin riba kumplimentu ku Lei di Bion.

Pues for di awor SER ta pidi pa esnan ku a tuma e inisiativa dje lei aki pa nan tene kuenta ku e posibel opstákulonan pa loke ta e mekanismo di kontròl i supervishon. Ademas SER ta kere ku por lo ménos lo mester hasi un evaluashon di Lei di Bion unda e efektonan di e lei aki ta ser poné banda di e metanan ku originalmente tabatin stipulá. Mester wak si e lei tabatin efekto riba empleo, efektonan fiskal i efektonan den sentido general riba tereno sosial ekonómiko.

E konosementu optené aki lo por ser usá pa antisipá riba e posibel efektonan ku por spera dje proyekto di lei aktual. Pues ta rekomendabel pa hasi un evaluashon mas pronto posibel.