WILLEMSTAD.- E kambio di lei riba glas skur di outo ta unu importante, pero hopi importante pa e propio seguridat dje polis, sigur si tene kuenta den e tempunan difísil i peligroso ku nos ta biba aden. Importante ta tambe pa e polis tin material adekuá pa e traha kuné na momentu di midi glas skur, pasobra tin di tene kuenta ku derecho dje doño di outo tambe. Esei ta loke parlamentario sra. Giselle McWilliam a trese dilanti ayera durante un reunion di komishon sentral pa trata e proposishon di lei aki presentá pa MFK. Segun e parlamentario, frakshon di MAN ta kontentu ku ta proponé un inisiativa di lei, kual ta un di su tareanan. Pero remarkabel ta ku frakshon di MFK a entregá un proposishon kambiá dia 6 di òktober 2021 i ya pa 11 di òktober esaki ta riba agènda pa keda tratá.

Pero riba e mesun proposishon di lei aki Konseho Konsultativo (Raad van Advies) a duna su konseho i ta papia di alternativa pa glas skur pa evitá entrada di lus i kalor di solo. RvA a proponé pa en bes di hasi glasnan skur, komo alternativa lo por usa “nano technologische film” blanku.

Mas aleu tambe RvA ta papia di konseho di dos ministerio, kualnan ta VVRP i Hustisia. Di e ministerio di hustisia ta papia di Kuerpo Polisial kual ta esun ku den ehekushon di nan trabou ta implementá e lei. Segun McWilliam den e promé tratamentu dje proposishon di lei aki frakshon di MAN tambe a pidi e konsehonan aki mirando ku ta e dos ministerionan aki ta den vèlt pa loke ta tráfiko. Por sierto, esnan ku a entregá e proposishon ta bisa den e memoria di aklarashon ku nan a pidi konseho di e ministerionan pero ku nan no a haña kontesta riba nan petishon. Pero dikon nan no a buska konseho aworakí promé ku bolbe bai komishon sentral? Ademas e dos ministernan ku lo mester duna un splikashon ta prosedente di e mesun partido MFK, for di unda e lei ta presentá.

Mas aleu sra. McWilliam a mustra riba importansia di un lei asina den ehekushon di trabou dje polis, pa su propio seguridat. Ta importante den e konsehonan pa sa kiko Kuerpo Polisial mes ta pensa di un lei manera esaki, sigur fo’i e punto di bista di seguridat.

Mas aleu e inisiadónan a presentá kopia dje kambio di lei similar ku tin na Boneiru. Pero na Boneiru tin investigashonnan ku a ser hasí promé ku e lei aki a drenta na vigor. I e investigashonnan aki primordialmente ta ku bista pa e polis. Es mas, na Boneiru a mustra riba e parti tékniko, kaminda e polis mester por tin na su disposishon un aparato pa midi graduashon di e film dje glas.

Den e proposishon di lei na Kòrsou ta bisa ku esaki no ta algu ku lo bai kosta gobièrnu, loke no ta bèrdat segun McWilliam pasobra kisas lo por sierto aparatonan ainda pero no ta sigur ku nan ta apto pa usa ainda. Mester sa kuantu aparato tin mester i eventualmente kuantu nan lo bai kosta.

E polis mester tin material pa e traha kuné, i no por disidí di un forma arbitrario si un glas ta muchu skur òf laga. E doño di outo tambe ta para riba su derecho. Ku e aparato e trabou di polis lo bira mas fásil i ta evitá diskushon.