WILLEMSTAD.-Partido MAN a tene un konferensia di prensa durante di kua e lider polítiko Steven Martina a duna splikashon na komunidat riba e resolushon di e partido pa loke ta trata e aseptashon di MAN pa e kombenio ku Ulanda. Pa partido MAN e loke tin riba mesa, ku ta inkluí un lei di konsenso, ta karga aprobashon. Djaweps awor gobièrnu ta bai Parlamento i ta na Parlamento pa disidí si ta aseptá òf rechasá loke gobièrnu a yega na dje.

Den prinsipio MAN a bisa di no ke niun lei di konsenso mas, i komo tal tabata hopi importante pa haña splikashon di e partido riba nan posishon. Martina a splika ku e resolushon di MAN a bisa ku nan ke evitá ku ta bini mas lei di konsenso i esei MAN a kumpli kuné tambe. Loke ta importante ta e “landen pakketten”. Ta eiden ta determiná kiko mester sosodé. MAN por biba ku kontenido di “landen pakketten”. Ademas e entidat ku no ta CHE mas pero OHO ta ai funshoná manera un banko. Ora tin mester di finansiamentu ta bai e entidat pa haña finansiamentu. E ròl di e entidat ta bira mas restringí i banda di esei e entidat no por tuma outoridat ni maneho den otro entidatnan di gobièrnu. Mas detaye den edishon di EXTRA.