WILLEMSTAD.- E profeshon di veterinario aki na Kòrsou ta pidi pa regulashon pa hopi tempu kaba. Kasi por papia aki di un “free for all”, simplemente pa motibu ku e sekshon aki den medisina no ta regulá. Hopi ku tin un tiki estudio ei i ku tin un papel ta kuminsá ku su práktika. E profeshon aki ta un dje trikinan ku no ta hinká den un bachi legal ainda. Intento i esfuersonan ta ser hasí, tin un lus na horizonte, den e sentido ku tin un konsepto di lei ku ta andando pa bai Parlamento ku e intenshon pa e keda aprobá i asina bini ku regulashon i reglamentashon.

T’asina ku e proyekto di lei aki ta unu ku ta kanando for di 2017, i for di e tempu ei Konseho Konsultativo (Raad van Advies) a duna su konseho i rekomendashonnan pa por konta ku un regulashon na drechi. RvA ta bisa ku for di 2018 el a duna su opinion riba e konsepto di lei pa stipulashon di reglanan pa bienestar di animalnan i práktika di e profeshon di veterinario. Den e okashon ei RvA a enfatisá ku lo ta un bon idea pa pone e regulashon i rekonosementu di profeshon aki di veterinario den un lei separá, i pa introdusí e reglanan den fase

Den kuadro di esaki RvA a haña presentá un inisiativa di lei nobo ku ta kontené reglanan pa ku bienestar di animal.

Den e konsepto di lei aki menshon ta ser hasí di un trayekto obligatorio di kapasitashon i rekapasitashon di (para)veterinarionan, aunke esnan ku a tuma e inisiativa dje lei aki ta parse di tal laga espasio pa yega na un regulashon propio dor di e profeshonalnan mes. Den e memoria di aklarashon ta ser bisá ku e teknologia ta desaroyá ku tantu rapides ku tin profeshonnan liber manera e.o. veterinario ta evaluá asina lihé ku lo ta nesesario pa tin un sistema di kapasitashon permanente pa asina garantisá ku e kalidat di servisio ta keda na nivel.

Den e mesun proyekto di lei aki ta krea e posibilidat pa duna eksonerashon i dispensashon, aunke esei ta mará na un kantidat di kondishon. Es mas, tambe den e mesun proyekto di lei aki ta stipulá e eksigensianan di kalidat pa loke ta e klínika mes i tambe aparatura.

Finalmente tambe ta e intenshon tambe pa instituí un “tuchtcollege” pa atendé tantu ku kehonan i tambe práktikanan dudoso i robes. E intenshon ta pa presidente dje kolegio menshoná ta miembro alabes di Korte Komun di Hustisia.