WILLEMSTAD.- E kuestion di drenta bai vota ku telefòn den man i ku e posibilidat di saka portrèt di bo voto ta algu ku defakto lo ta posibel pasobra e ta algu ku no ta stipulá ni prohibí den lei, i no tin sanshon tampoko. Pero na momentu ku un hende hasi esei, esta di drenta bai vota i ku telefòn den su poseshon, mester pensa i disidí kiko ta bai hasi. Esei di akuerdo ku sr. Pacheco Römer, presidente di Konseho Supremo Elektoral. Esei ta algu ku ta gobernantenan mester disidí.

Manera ta konosí, pa algun elekshon kaba tin votadónan ku ta drenta tras di kortina i pa un of otro motibu ta saka foto di nan formulario di voto. Esaki por ser konsiderá komo un forma di kometé froude i hasi un elekshon ku no ta kompletamente sekreto.

Por pensa un paso mas dilanti ku e asuntu aki. Semper lo por ta posibel ku un persona ta saka un foto di su formulario di voto (stembiljet) komo prueba pa eventualmente e ser kompensá dor di un òf otro polítiko. Pero esaki ta algu ku KSE elektoral no por hasi mashá na dje ya ku e no ta ser prohibí pa lei. Kisas den e proyekto di lei ku lo ser tratá awe den Staten si.

Un dje parlamentarionan ku a enfoká hopi riba e aspekto aki ayera tabata parlamentario sra. Jacinta Constancia. El a ekspresá e deseo di mira un artíkulo den e lei nobo ku ta ser tratá awe unda ta prohibí uso di telefòn na momentu di vota.

Segun sra. Constancia, dje forma ei ta protehá e sistema. Es mas, sra. Constancia ta kere ku si bini un prohibishon anto lo mester ekstendé e tempu pa bai vota. Pasobra si tin hendenan ku ta drenta ku telefòn na porta di e urna elektoral, mester krea e fasilidat i tempu pa por tuma nan telefòn, warda esaki i duna nan bèk na momentu ku nan ta kla. I un proseso manera esei ta tuma un tiki tempu.

Den su presentashon di promé tanda sra. Constancia tambe a duna komo ehèmpel sierto senarionan di korupshon. Tin hendenan ku lo ta bai para na urna ku maletin di plaka pa paga esnan ku vota pa nan partido. Pero e votadó lo mester tin prueba si dje voto. Si prohibí entrada ku telefòn, ta skapa yen dje problemanan aki.