WILLEMSTAD.- E mundu di animal aki na Kòrsou por ta satisfecho i kontentu. Esei pa motibu ku porfin e Lei pa Bienestar di Animal a keda aprobá ayera den Parlamento di Kòrsou. Algun di esnan ku sigur ta kontentu ta miembronan di e Fundashon pa Protekshon di Animal (Dierenbescherming) i parlamentario sra. Giselle McWilliam kende a tuma e inisiativa pa karga e lei aki durante algun aña huntu ku su frakshon (MAN) te ku awe por bisa ku e tin aprobashon di Staten. Solamente e lei lo tin di ser publiká ofisialmente pa e haña su bachi legal ofisial.

Durante e seshon públiko ayera sra. McWilliam tabata kompañá pa dos miembro di e fundashon ariba menshoná kendenan a yud’é den kontesta dje preguntanan ku tabatin di parti di parlamentarionan.

El a gradisí tur esnan ku di un òf otro forma a duna nan kontribushon pa e lei a keda akseptá.

Komo reakshon riba preguntanan ku a surgi sra. McWilliam a mustra su apresio ku ya kaba tin un krematorio pa animal aki na Brievengat, aunke no tin un santana ainda. Pero Dierenbescherming ta kanando e trayekto pa yega na e tereno pa un dia por habri un santana. Esaki lo ta algu digno sigur, ya ku por nota ku demasiado biaha animalnan morto ta ser tira den mondi òf na landfill. Sinembargo tin hendenan ku lo ke pa nan animal kerí haña un último lugá di sosiegu digno.

Tambe e tabatin reakshon riba e fenómeno di kachónan ku ta kana riba kaya i ku tambe ta masakrá krionan (kabritu, galiña etc.) di hende. Pero hopi di esaki lo bai dependé un tiki di terenonan ku Domeinbeheer lo por pone na disposishon di e fundashon pa fungi komo un sanktuario. Pero e ta spera ku mas pronto posibel lo por pone e terenonan na disposishon pa aliviá komunidat. Siendo den un sanktuario asta lo por resosialisá un kantidat di kachó, ku a posibilidat ku nan lo por haña un doño pa duna nan amor.