WILLEMSTAD.-Tin un preokupashon ta biba bou di gran mayoria di hende den komunidat ku si ta kumpliendo ku reglanan di higiena i medidanan di distansia pa evitá kontagio i plamamentu di Covid-19. Prinsipalmente den fin di siman por nota ku outoridatnan tin man yen pa plama aglomerashon di hende na sitio sitionan. Informashon ku a yega mesa di redakshon di EXTRA inisialmente ta bisa ku algun hende ta argumentá ku no tin lei ku ta kubri e medidanan ku gobièrnu ta anunsiando. EXTRA a nota ku gobièrnu a publiká “ministeriële beschikking” i huristanan ku EXTRA a konsulta tambe ta mustra ku tin MB ku hustamente ta spesifiká e área di kontrol pa loke ta trata Covid.

Den konsulta ku premier Eugene Rhuggenaath el a indiká ku den e “Beschikking aanwijzing  verbodsgebieden COVID-19” a apuntá diferente áreanan den kua un persona no tin mag di ta entre 23.00 te ku 5.00am. Esaki ta un disposishon ku Ministerio Públiko por mantené. Den e lei ku ta Parlamento aworakí, esta e Lei Estado di Emergensia tambe tin diferente provishon importante.

Sektor di komersio ta na altura di e desaroyonan i pa nan tambe ta bira importante pa tur detaye ta bon regla. Nan tambe  tuma nota di MB ku a keda publiká i ku ta un mandato di gobièrnu. A base di e MB outoridatnan por sanshoná restorant òf otro empresa ku faya.