Ku eksepshon algun, tur tienda mester sera 6’or atardi

WILLEMSTAD.-Gobièrnu di Kòrsou a anunsiá medidanan nobo entrante mayan DJAMARS 01 di dezèmber 2020. For di mayan ta drenta na vigor Lei Seku loke ta enserá ku ku no por kumpra bebida alkohóliko na snek, bar, restorant ni niun establesimentu di horeca. Un hende por kumpra bebida alkohóliko den toko òf supermerkado pero pa e bai kas kuné. No ta permití bebe bebida alkohóliko na e establesimentu, esei minister Quincy Girigorie a duna di konosé. Minister Girigorie a remplasá premier Rhuggenaath.

Tur kasino mester keda sera, trùk di pan por habri di 4’or te 8’or anochi, restorantnan ku tin terasa habri por sirbi kliente pero te na 50% di kapasidat. Minister Girigorie a enfatisá ku a tuma medida di tapaboka obligatorio i tambe “toque de queda” for di 9’or anochi pero e no a duna resultado deseá esta pa baha e kantidat di kontagio lokal. Kòrsou a pasa pa fase 4 di eskalashon i p’esei ta introdusí medidanan adishonal i mas severo. Mas detaye den edishon di EXTRA.