WILLEMSTAD.- Violashon di integridat dor di miembronan di kuerpo polisial ta tacha e bon nòmber i e konfiansa ku mester tin den e kuerpo aki. Kuerpo polisial mester ta dirigí di tal manera ku violashon di integridat ta algu ku ta ser evitá. I den kaso mes ku surgi kasonan di posibel violashon di integridat òf mal uso di proseduranan i/òf outoridat, KPC mester ta den e posishon pa hasi investigashon kuidadoso. Asina un rapòrt riba maneho di e ofisina di Asuntunan Interno (BIZ) ta bisa den un kompilashon. E ta bisa mas aleu ku, den kaso ku konstatá violashon di integridat, kuerpo polisial òf Minister di Hustisia mester ta den e posishon pa imponé e sanshonnan disiplinario apropiá na tempu i tuma medidanan adekuá tambe.

Den esaki ta un interogante te kon leu KPC ta den e posishon pa garantisá integridat denter di kuerpo, i den kaso di posibel violashon si e ta den posishon pa hasi investigashonnan disiplinario manera debe ser.

E gran pregunta ku ta surgi ta te kon leu e Ofisina di Asuntunan Interno ta den e posishon pa ehekutá investigashonnan disiplinario? E otro preguntanan ku ta surgi ta: kua lei ta ser apliká den kuadro di integridat? Di kiko e maneho di integridat di KPC ta konsistí?

E Lei di Reino Polisial ta bisa ku den kaso di stipulashon di un outoridat pa polis, tambe lo mester sòru pa un kódigo di komportashon. E kódigo di komportashon i profeshon ta stipulá den e dekreto di posishon hurídiko. Banda di e dekreto di posishon hurídiko tambe tin kódigonan di komportashon i profeshon den e Instrukshon di Trabou di polis. Pero segun e hefe di KPC e kódigonan di komportashon ni e dekreto di posishon di hurídiko ta sufisientemente efektivo i mester ser someté na kambio pa motibu ku e artíkulonan ta formulá den sentido general. Dor di esaki no ta tur komportashon deskabeyá di e polis por ser sanshoná, segun e hefe di KPC.

Pero banda di e kódigo di komportashon mester tin tambe un sistema di sanshon pa disipliná esnan ku violá e kódigo di komportashon. Pa garantisá transparensia i seguridat di derecho, KPC mester stipulá i ehekutá un maneho riba esaki. E sanshonnan disiplinario tambe mester ta parti di e dekreto riba posishon hurídiko. Sierto kastigunan no por ser imponé pa motibu ku ta falta un outoridat pa ku e kastigunan ei.