WILLEMSTAD.- Segun Lesley Fer, direktor di Directie Risicobeheersing & Rampenbeleid, polis ta kontrolá riba kaya. ‘I nan ta kita bo outo si bo no ta tene bo mes na reglanan.’ Fer: ‘Mi mes a tuma nota di e outo ku a ser kitá for di kaya. Pasobra e shofùrnan no ta kumpli ku e eksigensianan di Plachi di Dia òf otro medidanan.’ Fer a splika esaki durante konferensia di prensa di gobièrnu djaluna último.
Ministerio Públiko i Kuerpo Polisial mas ku un luna pasá a anunsiá un maneho di sero-toleransia ora ta trata di inkumplimentu ku medidanan di COVID. Ministerio Públiko a yama atenshon di pueblo en general, ku lo tin butnan konsiderabel si no kumpli ku e sanshonnan imponé dor di gobièrnu.
Kuerpo polisial for di fin di luna di Mart ta hasiendo kontròl intensivo ku e meta, pa den kuadro di òrdu públiko redusí e tráfiko di personanan riba kaya i asina evitá mas tantu posibel e riesgo di infekshon.
E montante di e transakshonnan ta basta severo i inkumplimentu di un transakshon, en prinsipio, ta kondusí na persekushon ku un demanda mas haltu na Korte. Asina Ministerio Públiko a duna di konosé. Direktor Lesley Fer durante konferensia di prensa djaluna último a bisa ku polis a duna diferente hende but pa no sigui ku reglanan di COVID.
Fer: ‘Butnan a ser duná. Tambe den medio di komunikashon resientemente a skibi tokante kasonan den korte ku hende ku a haña but a bai korte. Pero nos por mira ku a para ku e butnan. E butnan a ser duná.’ Segun Fer Ministerio Públiko ta sigui ku esaki.
Den e triángulo, e deliberashon entre Minister di Hustisia, polis i Ministerio Públiko a palabrá kiko e sanshonnan ta i kon polis ta aktua. Ta bisto ku en bèrdat e kontròlnan di parti di Kuerpo Polisial huntu ku Milisia i na algun okashon Defensa Hulandes ta intensivo for di mainta i te den oranan lat di anochi.