OM ta desepshoná i a indiká kaba ku ta apelá e sentensia

WILLEMSTAD.- Awe korte a dikta sentensia den e kaso konosí komo kaso Campo Alegre. Ta trata e kaso di tripel asesinato ku a tuma lugá riba e djadumingu 24 di yüli 2016 banda di 4’or di mardugá riba e lugá di stashoná outo di Campo Alegre. Di e kuater sospechosonan ku a presentá den korte tres a haña libertat kompará ku kastigu di entre 10 aña di prisòn pa bida largu ku Ministerio Públiko a pidi pa nan. Un sospechoso a haña un kastigu i esaki tambe ta un kastigu hopi mas abou kompará ku loke OM a presentá den su demanda.

Den korte a bin dilanti ku riba e dia 24 di yüli di 2016  e hòmbernan “Appa” Emerencia, “Pulun” Rosa i Leonard a pèrdè nan bida na momentu ku nan a keda likidá pa 54 bala for di armanan outomátiko. A base di esei wes a yega na e siguiente kondena pa e akusadonan: Libertat pa L. “Pushi” G. (1983), miéntras ku e demanda di fiskal kontra Pushi tabata 10 aña prisòn. Pa e akusado G. “Black” G. (1989) korte a dikta un sentensia di 18 luna prisòn, miéntras ku e demanda di fiskal den su kontra tabata 14 aña di prisòn. Pa e akusadonan J. “Kuchi” G. (1987) i R. “Bomba” C. (1987) wes a dikta libertat, miéntras ku fiskal su demanda kontra di e dos akusadonan aki tabata kastigu di bida largu.

Famia di defuntunan Emerenciana i Leonard a pidi un suma di  2.390 florin kada un komo rekompensa pa e gastunan di entiero.

Bosero di Ministerio Públiko Norman Serphos den un reakshon preliminar a bisa ku OM ta hopi desepshoná i ku for di awor a disidí kaba ku ta apelá e desishon di korte. Tur detaye di e kaso den EXTRA mayan.