WILLEMSTAD,- Segun lider di partido MAN, Steven Martina, gabinete Pisas II resientemente a tuma desishon ku entrante luna di sèptèmber 2021 ta stòp ku ayudo di sosten na empresanan. Martina a splika ku e desishon a keda tumá ‘sin un estudio previo kiko ta bira e konsekuensia i e impakto di e desishon aki.’

Martina, djamars último durante rueda di prensa di MAN a splika ku ‘e desishon aki sigur ta motibu ku Minister Javier Silvania di Finansa ta kana broma kuné i bisa ku e ta baha “liquiditeitstekort” a kosto di eliminashon di sosten na ayudo di empresa i otronan.’

Martina no ta di akuerdo ku desishon di gobièrnu di Kòrsou. E ta bisa: ‘Straño ku por ta no a bin ningun reakshon di parti di VBC riba e desishon di Gabinete Pisas II. Partido MAN i Frakshon di MAN ta spera sinseramente ku e desishon pa stòp ayudo di NOW i empresario individual no resultá ku diferente empresa lo sera, I hendenan ta bai pèrdè trabou.’

Den gabinete anterior, na momento ku Kòrsou tambe a keda afektá pa e pandemia di COVID-19 na luna di mart 2020 ‘mester a tuma medida na bienestar di salú di nos pueblo. E medidanan aki sigur a kousa doló i tambe tabatin resistensia manera semper ta e kaso na momento ku un gobièrnu mester rekurí na medida’, asina Martina ta splika.

Pa garantisá mantenshon di kupo di trabou gobièrnu a hasi fiansa kuantioso via Hulanda. Tur esaki pa evitá pèrdida di mas ku 17 mil kupo di trabou. Martina: ‘Medida di sosten nunka por ta pa semper! Mester remarká ku si no tabata pa e pandemia di COVID-19 aña 2020 tabata un aña ku Kòrsou lo a konosé kresementu ekonómiko i inkluso lo a sera aña 2020 ku surplus riba presupuesto.

Tambe Martina a bisa ku   gabinete Pisas II den reunion di Konseho di Minister di dia 30 di yüli 2021 a bai di akuerdo pa implementá diferente medida riba diferente Fondo Sosial i Fondo di malesa di SvB ku konsekuensia negativo pa pueblo.

BVZ (basisverzekering ziektekosten) entre otro:

ta limitá e servisio di fysioterapia, terapia di ehersisio i quiro-práktika fo’i pakete di kuido básiko di pashènt;

aparatonan/instrumentonortopédiko i mea di sosten ta keda eliminá fo’i pakete di kuido básiko di pashènt;

transplante di kurason, pulmon i higra ta keda saka fo’i pakete di kuido básiko di pashènt.

Martina: ‘Esaki ta nifiká ku e hende humilde den nos komunidat ku no tin sufisiente entrada òf no tin entrada “at all” ta kore riesgo grandi pa muri numa.’ Martina ta puntra si ‘ta asina aki ta Pueblo su Bùrt’?