ORANJESTAD – E portal Noticiacla a informá awe mainta di un detenshon grandi na Aruba. Ta trata aki di un persona importante den mundu di mafia di kokaina ku keda detené. Minister di Hustisia Rocco Tjon a konfirmá esaki pa Noticiacla. Segun bosero di Ministerio Públiko di Aruba Ann Angela, e persona aki “lo keda manda mas rápido posibel pa Hulanda”. Ta trata di un Surinameño konosí komo Siegfried ‘Piet’ W, di 53 aña. Na Hulanda outoridatnan lo a haña informashon ku e persona lo a sali di Sürnam, direkshon pa Aruba unda ku OM di Hulanda lo a hasi un petishon pa su detenshon.

Djaranson ora ku e persona aki a yega, durante kontrol di pasport, alarma a bati i a pasa pa su detenshon mesora. Aparentemente e lo a hui pa Sürnam despues di a sinta un parti di kastigu i durante un ‘verlòf’ a hui. Awor Ministerio Públiko ta pidi pa mand’e bek pa Hulanda pa e kaba sinta su kastigu.

E ta wòrdu mira komo un lider indiskutibel di un organisashon di droga, ku a tene su mes okupá ku e trafikashon di kokaina.