WILLEMSTAD.- Pueblo por skohe ki tipo di liderazgo e ke, e por skohe pa desensia òf pa dekadensia! Ayera na okashon di traspaso di batuta di liderazgo di partido PAR, sr. Eugene Rhuggenaath a ekspresá palabranan di apresio pa e lider polítiko saliente, sra. Zita Jesus-Leito. El a bisa ku ta ku gran honor e ta risibí e batuta. E momentu aki a yega despues ku el a pasa e trayekto i a mira diferente lider polítiko. Komo hóben Parista e tabata tei presente na transishon di e lider fundadó Miguel Pourier pa Etienne Ys. E tabata testigu tambe dje traspaso di Etienne pa sra. Emily de Jongh-Elhage. Finalmente el a mira kon Zita a tuma e batuta i “kore” kuné den e último elekshon.
Pero komo Parista nunka el a pensa di ta para komo lider polítiko. Sinembargo a esei ta PAR, un partido konosí pa transishon di liderazgo ehemplar, un partido ku semper a duna hóbennan oportunidat pa krese, un partido kaminda kada lider na nan manera lo bai den historia komo gran sirbidónan di nos pais. Pues p’e ta un honor di por sigui kana den nan pasonan, segun Rhuggenaath.
Seguidamente i refiriendo na Zita, el a opservá ku su bida ta un inspirashon, su dedikashon i determinashon ta su motivashon, i danki na Zita su esfuersonan komo presidente i lider polítiko ku awe tin un PAR fuerte atrobe. PAR ta sigui komo un organisashon, un tim ku ta lucha den harmonia. P’esei mes e ke sigui kana ku Zita den su banda, i asina tambe el a ekspresá e deseo di tin Zita komo presidente di partido PAR.
Segun Rhuggenaath, den esun aña ku a pasa aki el a ser aserká pa dos yamada. Primeramente el a haña e oportunidat pa sirbi komo minister. I den kuadro di esei el a pone su karera un banda pa sirbi pais. I asina el a logra kosnan grandi na e.o. Dòk, haf, airopuerto. Den elekshon e último pueblo a honra PAR ku 4 asiento.
E di dos yamada tabata pa tuma e batuta over. Kisas esaki a yega promé ku tempu. Pero mirando e konfiansa ku Zita a depositá den dje i ku sosten di miembronan el a akseptá e reto.
Segun Rhuggenaath, nos ta na un momentu krusial, nos pais a na un krusada importante, tin preokupashon grandi den komunidat, tenshon, insertidumbre, i tin hopi hende ku ta pèrdiendo speransa.
Loke por mira último tempu ta un polítika di individualismo, di oportunismo i di destrukshon. E ta destruktivo pa nos ekonomia i bienestar. Nos ta na un krusada kaminda e pueblo definitivamente mester skohe ki tipo di liderazgo e ke, ki tipo di gobièrnu e ke, ki tipo di pais e ke ta. E por skohe pa desensia òf pa dekadensia.