WILLEMSTAD.– Pa mas di 10 aña kaba Liga Blòwi, un grupo dinámiko ku ta konsistí di amigu i konosí, tei pa sostené i animá trese vibranan positivo den nos komunidat. Di un forma úniko nan a gara atenshon i kariño di grandi i chikí.
Aña 2026 ya ta yená ku aktividatnan deportivo ku lo keda pa semper grabá den historia. Esaki ta duna Liga Blòwi otro oportunidat atrobe pa pone enfoke riba unidat nashonal. No ta pòrnada tin e dicho: uní nos ta fuerte i dividí nos ta pèrdí!
Mas ku deporte.
E propósito di Liga Blòwi ta bai mas leu ku deporte. E grupo ta traha aktivamente pa:
Fortalesé patriotismo; Promové unidat nashonal; Uni kultura, deporte i hermandat.
E aña aki Liga Blòwi ta bai organisá diferente aktividat ku lo kontribuí na e 3 puntonan ariba menshoná. Alabes lo ta hopi great ku meskos ku pa añanan a apoyá nos selekshon nashonal di futbòl, Liga Blòwi logra pa bai sostené nos selekshon nashonal di manera masal i visibel na Kopa Mundial 2026.
Aktividatnan i rekoudashon di fondo: 18 di yanüari - Inskripshon di tumba gimmick armbant; 26-30 yanüari - Tumba Gimmick armbant i Djòmp in; 5 di febrüari - Djùmp in; 8 – 17di febrüari - Kaya Blou Marcha nan di Karnaval; 6 aprel - Liga Blòwi Stand pa seú; 23 di Mei Unity Blue Walk; Juni The Bluewave Curaçao Support team na Mundial.
Huntu nos por logra esaki
No ta tur di e 160.000 habitantenan di Kòrsou por ta físikamente presente na kopa Mundial, pero Liga Blòwi ta kla pa laga mundu konosé e kalor, ritmo i vibrashon di e bon yu di Kòrsou. I tur hende lo por kontribuí ku esaki. P’esei Liga Blowi ta hasi un yamada na tur siudadano, empresa i organisashon pa duna un man den kualkier forma.
Huntu nos por hasi ku Kòrsou no solamente ta fuerte riba tereno, sino tambe fuerte den tribuna. Pa mas informashon òf pa duna un kontribushon por tuma kontakto ku Luigino Genaro, aka Blòwi, na 6799726 òf mail na ligablowi@gmail.com.